പെരുന്ന: സമദൂരത്തിലെ ശരിദൂരം, സമദൂരത്തിലെ സത്യം ഇതാണ് എൻ എസ് എസിന്റെ നിലപാടെന്ന് ജനറൽ സെക്രട്ടറി ജി സുകുമാരൻ നായർ. മന്നത്ത് ആചാര്യൻ മുതൽ സ്വീകരിച്ച നിലപാടാണ് സമദൂരം. സംഘടനയ്ക്ക് രാഷ്ട്രീയമില്ലെന്നും സുകുമാരൻ നായർ പറഞ്ഞു. ചങ്ങനാശേരി പൊരുന്നയിലെ എൻഎസ്എസ് ആസ്ഥാനത്ത് പൊതു യോഗ ശേഷം സംസാരിക്കുകയായിരുന്നു അദ്ദേഹം.
ശബരിമല വിഷയത്തിൽ എൻ എസ് എസിന്റെ നിലപാടിലല്ല മാറ്റമുണ്ടായിരിക്കുന്നത്. സർക്കാരിന്റെ നിലപാടിലാണ് മാറ്റം ഉണ്ടായിരിക്കുന്നത്. ഈ നിലപാട് എൻ എസ് എസിന്റെ നിലപാടിനോട് അടുത്ത് എത്തിയിരിക്കുന്നതിനാലാണ് അനുകൂലിച്ചതെന്ന് സുകുമാരൻ നായർ പറഞ്ഞു. ഒരു രാഷ്ട്രീയപാർട്ടിക്കൊപ്പവും എൻ എസ് എസ് ഇല്ല. ഈ വിഷയത്തിൽ ആരും ചർച്ചയ്ക്കായി എൻ എസ് എസ് ആസ്ഥാനത്തേയ്ക്ക് വരേണ്ടതില്ലെന്നും സുകുമാരൻ നായർ പറഞ്ഞു.
എൻഎസ്എസിന് പുതിയ ആസ്ഥാന മന്ദിരം പണിയും. കാലത്തിന് അനുസരിച്ചുള്ള മാറ്റങ്ങൾ സ്വീകരിക്കണം. സംഘടനയുടെ അന്തസ്സിന് യോജിച്ച, എല്ലാ ആധുനിക സൗകര്യങ്ങളുമുള്ള ആസ്ഥാനമാകും നിർമിക്കുക. നിർമാണ പ്രവർത്തനം ഉടൻ ആരംഭിക്കുമെന്നും അദ്ദേഹം പറഞ്ഞു. സുകുമാരൻ നായർക്ക് പൊതുയോഗം പൂർണ പിന്തുണ അറിയിച്ചു.
