ഗുണ്ടൂര് (ആന്ധ്ര): 62ാമത് ദേശീയ ചെസില് നാലാം റൗണ്ട് പൂര്ത്തിയായപ്പോള് മുന് മൂന്ന് ദേശീയ ചാമ്പ്യന്മാരായ ഗ്രാന്റ് മാസ്റ്റര്മാര് ഉള്പ്പെടെ ഏഴ് പേര് മുന്നില്. മുന് ദേശീയ ചാമ്പ്യന്മാരായ സൂര്യ ശേഖര് ഗാംഗുലി, ശശികിരണ്, ലളിത് രോഹിത് എന്നീ ഗ്രാന്റ് മാസ്റ്റര്മാര് നാല് കളികളും ജയിച്ച് നാല് പോയിന്റോടെ മുന്നിലാണ്. ഇവര്ക്കൊപ്പം ഇന്റര്നാഷണല് മാസ്റ്റര്മാരായ അമേയ ഓഡി (ഗോവ), ഗൗതം കൃഷ്ണ( കേരളം), ആരണ്യോക് ഘോഷ് (ആര്എസ് പിബി), കാഷിഷ് മനോജ് ജെയിന് (മഹാരാഷ്ട്ര) എന്നിവര്ക്കും നാല് ജയങ്ങളോടെ നാല് പോയിന്റുകള് വീതമുണ്ട്.
കേരളത്തിന്റെ അഭിഷേക് കൃഷ്ണ ഫോമിലാണ്. ഗ്രാന്റ്മാസ്റ്റര് നോം ലഭിച്ച ഇന്റര്നാഷണല് മാസ്റ്ററായ ആയുഷ് ശര്മ്മയ്ക്ക് (ആര്എസ് പിബി) കഷ്ടിച്ച് അഭിഷേക് കൃഷ്ണയില് നിന്നും സമനില ലഭിച്ചു. തമിഴ്നാട്ടില് നിന്നുള്ള ഇന്റര്നാഷണല് മാസ്റ്റര് രവി തേജ ആനയും (ബിഷപ്പും) കുതിരയും (നൈറ്റ്) ഉപയോഗിച്ചുള്ള എന്ഡ് ഗെയിമില് വിജയിച്ചത് കൗതുകമായി. ഗുജറാത്തിലെ ജിതന് തേജസ് ഷായ്ക്കെതിരെ ആറ് മണിക്കൂര് നീണ്ട പോരാട്ടത്തിലനൊടുവില് 143ാം നീക്കത്തിലാണ് രവി തേജ വിജയം നേടിയത്.
ചില ഗ്രാന്റ് മാസ്റ്റര്മാര്ക്ക് സമനില കൊണ്ട് തൃപ്തിപ്പെടേണ്ടിവന്നു. തമിഴ്നാട്ടില് നിന്നുള്ള ഗ്രാന്റ് മാസ്റ്റര് ശ്രീഹരിയ്ക്ക് കേരളത്തില് നിന്നുള്ള ആദിക് തിയോഫെയ്ന് ലെനിനുമായി സമനില വഴങ്ങേണ്ടിവന്നു. റൂക്കും (തേര്) പോണും (കാലാളും) ചേര്ന്നുള്ള ഈ എന്ഡ് ഗെയിം ഏറെ കൗതുകമുണര്ത്തിയിരുന്നു.
ജന്മഭൂമി ഓണ്ലൈന്