കൊച്ചി: സിപിഎം നേതാവ് കെജെ ഷൈനിനെതിരായ സൈബര് ആക്രമണക്കേസില് കഴിഞ്ഞ രാത്രി അറസ്റ്റിലായ യൂട്യൂബര് കെഎം ഷാജഹാന് ജാമ്യം. എറണാകുളം സിജെഎം കോടതിയാണ് കെഎം ഷാജഹാന് ജാമ്യം നല്കിയത്.
25000 രൂപയുടെ ബോണ്ട് അടക്കം ഉപാധികളോടെയാണ് ജാമ്യം അനുവദിച്ചത്. ജാമ്യത്തിലിറങ്ങിയശേഷം തെളിവുകള് നശിപ്പിക്കരുതെന്നും സമാന കുറ്റകൃത്യം ആവര്ത്തിക്കരുതെന്നും കോടതി ഉത്തരവില് പറയുന്നു. ഷാജഹാനെതിരെ കേസെടുത്ത് മൂന്നു മണിക്കൂറില് അറസ്റ്റുണ്ടായി. അറസ്റ്റ് ചെയ്യാന് ചെങ്ങമനാട് സിഐയ്ക്ക് ആരാണ് അധികാരം നല്കിയതെന്ന് കോടതി ചോദിച്ചു.
പ്രത്യേക അന്വേഷണ സംഘമാണ് അറസ്റ്റ് ചെയ്തതെന്ന് പൊലീസ് കോടതിയെ അറിയിച്ചപ്പോള് പ്രത്യേക അന്വേഷണ സംഘത്തിന്റെ ഉത്തരവ് ഹാജരാക്കാന് കോടതി ആവശ്യപ്പെട്ടു. കേസ് എടുത്തശേഷം മൂന്നു മണിക്കൂര് കൊണ്ട് എങ്ങനെ തിരുവനന്തപുരത്തു എത്തി അറസ്റ്റ് ചെയ്തുവെന്നും കോടതി ആരാഞ്ഞു. റിമാന്ഡ് റിപ്പോര്ട്ടില് ലൈംഗികചുവയുള്ള ഏതെങ്കിലും വാക്ക് ഉണ്ടോയെന്നും കോടതി ചോദിച്ചു
കേസിന് കാരണമായ വീഡിയോയില് കെ ജെ ഷൈനിനോടുള്ള ചോദ്യങ്ങളല്ലെ ഉള്ളതെന്നും അശ്ലീലമായ ഉള്ളടക്കം ഉണ്ടോയെന്നും കോടതി പ്രോസിക്യൂഷനോട് ചോദിച്ചു. എന്നാല് ഷാജഹാന് കുറ്റങ്ങള് ആവര്ത്തിക്കുകയാണെന്ന് പ്രോസിക്യൂഷന് വാദമുയര്ത്തി. കൂടുതല് ചോദ്യം ചെയ്യുന്നതിനായി കസ്റ്റഡി ആവശ്യപ്പെട്ടെങ്കിലും കോടതി ഈ ആവശ്യം തള്ളി, ജാമ്യം അനുവദിക്കുകയായിരുന്നു. കെഎം ഷാജഹാനെതിരെ പുതിയ കേസ് രജിസ്റ്റര് ചെയ്ത് തിരക്കിട്ട് അറസ്റ്റ് ചെയ്തതിനെ തുടര്ന്നാണ് കോടതി ജാമ്യം അനുവദിച്ചത് .
സിപിഎം നേതാവ് കെ ജെ ഷൈനും വൈപ്പിന് എംഎല്എയ്ക്കുമെതിരായ സൈബര് ആക്രമണ കേസിലാണ് പ്രതിപക്ഷം എന്ന യൂട്യൂബ് ചാനലിന്റെ ഉടമ കെഎം ഷാജഹാനെ പൊലീസ് അറസ്റ്റ് ചെയ്തത്. ഷൈനിന്റെ പേര് പറഞ്ഞിട്ടില്ലെന്നായിരുന്നു ഷാജഹാന് വാദിച്ചത്. രണ്ട് ദിവസം മുമ്പ് കെജെ ഷൈനിന്റെ പേര് പറഞ്ഞ് പുതിയൊരു വീഡിയോ ഷാജഹാന് പുറത്തുവിട്ടിരുന്നു. ഇതില് ഷൈന് നല്കിയ പുതിയ പരാതിയിലാണ് അറസ്റ്റ് ഉണ്ടായത്.
