തിരുവനന്തപുരം: ഫാര്മസ്യൂട്ടിക്കല് സ്ഥാപനം ഒഴിപ്പിച്ചെടുക്കാന് ക്വട്ടേഷനെടുത്ത് സിപിഎം നേതാവ് വഞ്ചിയൂര്ബാബു. വഞ്ചിയൂര് അമ്പലത്തുമുക്കിലെ എക്സൈസ് ഓഫീസും ഫാര്മസ്യൂട്ടിക്കല് സ്ഥാപനവും അടിച്ചുതകര്ത്ത് സിപിഎം ഗുണ്ടകള്.
സിപിഎം വഞ്ചിയൂര് ഏര്യാകമ്മറ്റി സെക്രട്ടറിയും മുന് കൗണ്സിലറും കോര്പ്പറേഷന് സ്റ്റാന്റിംഗ് കമ്മിറ്റി ചെയര്പേഴ്സണ് ഗായത്രിബാബുവിന്റെ അച്ഛനുമായ വഞ്ചിയൂര് ബാബുവിനെ ഒന്നാംപ്രതിയാക്കി വഞ്ചിയൂര് പോലീസ് കേസെടുത്തു. വര്ഷങ്ങളായി ലീസിനെടുത്ത് പ്രവര്ത്തിക്കുന്ന സ്ഥാപനം ഒഴിപ്പിച്ചെടുക്കുന്നതിനായാണ് ക്വട്ടേഷനെടുത്തത്. ഇതിനു പിന്നില് കോടികളുടെ പണമിടപാടുണ്ടെന്നും ആക്ഷേപം.
ഫാര്മസ്യൂട്ടിക്കല് സ്ഥാപനം അടിച്ചുതകര്ത്ത കേസില് സൗത്ത് പാര്ക്ക് ഗ്രൂപ്പിന്റെ പരാതിയിലും സമീപത്തുള്ള എക്സൈസ് ഓഫീസ് തകര്ത്ത സംഭവത്തിലും അഭിഭാഷകനായ അനന്തു ഉള്പ്പെടെ 17 പേരാണ് പ്രതികള്. വഞ്ചിയൂര് ബാബുവും അഡ്വ. അനന്തവും കണ്ടാലറിയാവുന്ന മറ്റ് 15 പേരും ചേര്ന്ന് അമ്പലത്തുംമുക്കിലുള്ള ഫാര്മസ്യൂട്ടിക്കല്സ് ആന്റ് കെമിക്കല്സ് ട്രാവന്കൂര് പ്രൈവറ്റ് ലിമിറ്റഡ് എന്ന സ്ഥാപനത്തില് അതിക്രമിച്ചു കയറി അക്രമം നടത്തുകയായിരുന്നു.
രാവിലെ 8 മണിയോടെ ഗേറ്റിന്റെ പൂട്ട് തകര്ത്ത് അകത്തുകയറിയ സംഘം സെക്യൂരിറ്റിയെ മര്ദ്ദിക്കുകയും ബോണ്ടഡ് മാന്യുഫാക്ചറിംഗ് റൂമിന്റെ പൂട്ടിളക്കി അതിക്രമിച്ചുകടന്ന് സ്പിരിറ്റ് സൂക്ഷിച്ചിരുന്ന സ്റ്റീല് ടാങ്കുകളിലെ അടപ്പുകള് ഇളക്കുകയും പ്ലാന്റ് മിഷണറികള് നശിപ്പിക്കുകയും സ്റ്റീല് അലമാരകളുടെ വാതിലുകള് തല്ലിപ്പൊളിച്ച് ഫയലുകള് നശിപ്പിക്കുകയും ചെയ്തുവെന്നാണ് പരാതി.
സ്ഥാപനത്തിന്റെ ഓഫീസിലും പരിസരത്തും പ്രതികള് ഗുണ്ടകളുടെ സഹായത്തോടെ അതിക്രമിച്ച് കയറി നാശനഷ്ടം വരുത്തിയെന്ന് ഉടമസ്ഥരായ സൗത്ത് പാര്ക്ക് ഗ്രൂപ്പ് നല്കിയ പരാതിയില് പറയുന്നു. തമിഴ്നാട് സ്വദേശി നാഗപ്പന്ചെട്ടിയാരുടെ ഉടമസ്ഥതയിലുള്ള സ്ഥലത്ത് വര്ഷങ്ങളായുള്ള വാടകക്കരാറിന്റെ അടിസ്ഥാനത്തിലാണ് സ്ഥാപനം പ്രവര്ത്തിക്കുന്നത്.
രാവിലെ ഉണ്ടായ സംഘര്ഷത്തിനുശേഷം ഉടമസ്ഥര് എത്തിയപ്പോള് പ്രതികള് പിന്മാറിയെങ്കിലും വൈകുന്നേരം വീണ്ടും ആളുകളുമായി എത്തിയ സംഘം ഓഫീസിലെ കമ്പ്യൂട്ടറുകളും കോടികള് വിലവരുന്ന സാധന സാമഗ്രികളും തകര്ത്തു. ഇതേ കെട്ടിടത്തില് പ്രവര്ത്തിച്ചിരുന്ന എക്സൈസ് ഓഫീസിലെ ഉപകരണങ്ങളും രേഖകളും അക്രമി സംഘം തകര്ത്തു. ഫാര്മസ്യൂട്ടിക്കല് ഉത്പാദനത്തിന് വേണ്ടിയുള്ള സ്പിരിറ്റ് ഉള്പ്പെടെയുള്ള രാസവസ്തുക്കള് സൂക്ഷിക്കുന്നതിനാലാണ് എക്സൈസ് ഓഫീസ് ഇവിടെ പ്രവര്ത്തിച്ചിരുന്നത്.
എക്സൈസ് ഉദ്യോഗസ്ഥര് തിങ്കളാഴ്ച രാവിലെ എത്തിയപ്പോഴാണ് അവിടെ അക്രമം നടന്ന വിവരം അറിഞ്ഞത്. എക്സൈസ് നല്കിയ പരാതിയിലും വഞ്ചിയൂര് പോലീസ് കേസെടുത്തിട്ടുണ്ട്.
