തിരുവനന്തപുരം: കഠിനംകുളം ആതിര കൊല്ലപ്പെട്ട കേസില് പ്രതി ചെല്ലാനം ജോണ്സന് ജയിലില് വിചാരണ നേരിടണമെന്ന് അഡീ. ജില്ലാ സെഷന്സ് കോടതി ഉത്തരവിട്ടു. പ്രതി പുറത്തിറങ്ങുന്നത് സമൂഹത്തിന് ആപത്താണെന്നും അതിനാല് ജാമ്യം നല്കാനാവില്ലെന്നും കോടതി വ്യക്തമാക്കി. ജനുവരി 21നാണ് വെഞ്ഞാറമൂട് ആലിയാട് പ്ലാവിള വീട്ടില് ആതിരയെ (മാളു-30) കഴുത്തില് കുത്തേറ്റ് മരിച്ച നിലയില് കണ്ടെത്തിയത്.
ഇന്സ്റ്റഗ്രാം വഴി പരിചയപ്പെട്ട ആതിരയും ജോണ്സണും ഏറെക്കാലമായി അടുപ്പത്തിലായിരുന്നു. കഠിനംകുളം പാടിക്കവിളകം ക്ഷേത്രത്തിലെ പൂജാരിയായ ഭര്ത്താവ് രാജീവ് അമ്പലത്തിലും കുട്ടി സ്കൂളിലും പോയ തക്കത്തിന് സംഭവദിവസം പ്രതി ആതിരയുടെ വീട്ടില് ചെല്ലുകയായിരുന്നു. ആതിര ചായ എടുക്കാന് പോയ സമയത്ത് കൈയിലുണ്ടായിരുന്ന കത്തി ജോണ്സണ് കിടപ്പുമുറിയിലെ മെത്തയ്ക്ക് അടിയില് ഒളിപ്പിച്ചു. തുടര്ന്ന് ലൈംഗിക ബന്ധത്തില് ഏര്പ്പെടുകയും അതിനിടെ കത്തിയെടുത്ത് ആതിരയുടെ കഴുത്തില് കുത്തിയിറക്കുകയുമായിരുന്നു. രക്തം പുരണ്ട ഷര്ട്ട് വീട്ടില് ഉപേക്ഷിച്ച് പകരം ആതിരയുടെ ഭര്ത്താവിന്റെ ഷര്ട്ട് ധരിച്ചും ആതിരയുടെ സ്കൂട്ടറിലുമാണ് പ്രതി രക്ഷപ്പെട്ടത്. വിവാഹിതനും മൂന്നു മക്കളുമുള്ള ജോണ്സണ് കുടുംബവുമായി വേര്പിരിഞ്ഞ് കഴിയുകയായിരുന്നു. ആതിരയോട് കുടുംബം ഉപേക്ഷിച്ച് തന്നോടൊപ്പം വരാന് ഇയാള് നിര്ബന്ധിച്ചെങ്കിലും കുട്ടിയെ കരുതി ആതിര അതിനു തയ്യാറായില്ല. ഇതാണ് കൊലപാതകത്തില് കലാശിച്ചതെന്ന് കുറ്റപത്രത്തില് പറയുന്നു.
