കോഴിക്കോട്: സമസ്ത ജംഇയ്യത്തുല് ഖുത്വബ ജനറല് സെക്രട്ടറി സ്ഥാനത്ത് നിന്ന് നാസര് ഫൈസി കൂടത്തായി രാജി വെച്ചു. പ്രവര്ത്തക സമിതിയിലെ പലരും താന് സംഘടനയുടെ ജനറല് സെക്രട്ടറി സ്ഥാനത്ത് തുടരുന്നതില് വിയോജിപ്പ് അറിയിച്ചതിനാല് തുടരാന് ആഗ്രഹിക്കുന്നില്ലെന്നും സ്ഥാനം ഒഴിയുകയാണെന്നും അദ്ദേഹം വ്യക്തമാക്കി. സമസ്ത നേതാക്കളെ അപമാനിച്ച് നാസര് ഫൈസി കൂടത്തായി പ്രസ്താവന നടത്തിയെന്നതിന്റെ പേരില് ലീഗ് വിരുദ്ധ വിഭാഗം നാസര് ഫൈസിക്കെതിരെ സംസ്ഥാന പ്രവര്ത്തക സമിതിയില് അവിശ്വാസ പ്രമേയം കൊണ്ടുവന്നിരുന്നു. പ്രമേയം യോഗം ചര്ച്ച ചെയ്തതിന് പിന്നാലെയാണ് രാജി.
സമസ്ത മുശവറ അംഗങ്ങളെയും സാദിഖലി തങ്ങളെയും വ്യക്തിപരമായി പോലും അധിക്ഷേപിച്ച് സമൂഹമാധ്യമങ്ങളില് പ്രചാരണം നടത്തിയ സംഘടനയുടെ ഭാരവാഹികളെ കുറിച്ചും താന് ഉന്നയിച്ച കാര്യത്തില് തെളിവുകള് ബോധ്യപ്പെടുത്താന് അടുത്ത പ്രവര്ത്തക സമിതിയില് അവസരം നല്കണമെന്നും നാസര് ഫൈസി പുറത്തിറക്കിയ കുറിപ്പില് പറയുന്നു
