ബെംഗളൂരു: സമൂഹമാധ്യമങ്ങളില് അപകടകരമാണെന്ന് തോന്നുന്ന ഉള്ളടക്കങ്ങള് നീക്കം ചെയ്യുന്നതിനുള്ള ഉത്തരവിടാന് കേന്ദ്രസര്ക്കാര് പ്രതിനിധികള്ക്ക് അവകാശമുണ്ടെന്ന് കര്ണ്ണാടക ഹൈക്കോടതി. ഇതിനെ എതിര്ത്തുകൊണ്ട് ഇലോണ് മസ്കിന്റെ എക്സ് എന്ന സാമൂഹ്യമാധ്യമത്തിന്റെ പ്രതിനിധി നല്കിയ പരാതി കര്ണ്ണാടക ഹൈക്കോടതി ജസ്റ്റിസ് നാഗപ്രസന്ന തള്ളിക്കളഞ്ഞു.
അമേരിക്കയില് ഒരു കാലത്ത് സ്വതന്ത്രമായ സംഭാഷണം നടത്താനുള്ള അവകാശത്തെയും കലാകാരന്മാരുടെ ആവിഷ്കാരസ്വാതന്ത്ര്യത്തെയും ഒരിയ്ക്കലും വിലക്കരുതെന്ന് പറഞ്ഞിരുന്നതാണ്. പക്ഷെ ഇപ്പോള് അവരുടെപ്പോലും കാഴ്ചപ്പാട് മാറിയിരിക്കുന്നു. അമേരിക്കയെപ്പോലുളള ലിബറല് സമൂഹങ്ങള് പോലും ഫ്രീ സ്പീച്ചിനെ ഭയപ്പെടാന് തുടങ്ങിയിരിക്കുന്നുവെന്നും സമൂഹമാധ്യമങ്ങളെ നിയന്ത്രിക്കേണ്ടതുണ്ടെന്നും ഈ കേസില് വാദംകേള്ക്കുകയായിരുന്ന കര്ണ്ണാടക ഹൈക്കോടതി ജഡ്ജി നാഗപ്രസന്ന പറഞ്ഞു.
ന്യായീകരണമുള്ള സംഭാഷണങ്ങളുടേത് പോലെ നിയമവിരുദ്ധമായ ഉള്ളടക്കങ്ങളെ കാണാനാവില്ലെന്ന് എക്സിനെതിരെ വാദിച്ച കേന്ദ്രസര്ക്കാര് പ്രതിനിധി കോടതിയെ അറിയിച്ചു. വ്യക്തമായി ന്യായീകരിക്കാവുന്ന സംഭാഷണങ്ങളെ വേറിട്ട് കാണണമെന്നും നിയമവിരുദ്ധ ഉള്ളടക്കങ്ങളെ നിയന്ത്രിക്കണം എന്നുമാണ് കേന്ദ്ര സര്ക്കാരിന്റെ വാദം.
