കരുനാഗപ്പള്ളി: മാതാ അമൃതാനന്ദമയി ദേവിയുടെ എഴുപത്തിരണ്ടാം ജന്മദിനത്തിന്റെ ഭാഗമായി അമൃതപുരിയില് എത്തുന്നവരെ സ്വീകരിക്കുന്നതിനുള്ള ഒരുക്കങ്ങള് അവസാനഘട്ടത്തിലേക്ക്. ജന്മദിനമായ 27ന് രാവിലെ 5ന് 108 ഗണപതിഹോമങ്ങളോടെ അമൃതപുരിയില് ആഘോഷങ്ങള്ക്ക് തുടക്കമാകും. തുടര്ന്ന് ഗുരുപാദപൂജ, അമ്മയുടെ ജന്മദിന സന്ദേശം, വിശ്വശാന്തി പ്രാര്ത്ഥന, ഭജന, സത്സംഗം, പ്രസാദ വിതരണം എന്നിവ നടക്കും.
ലോകത്തിന്റെ നാനാഭാഗങ്ങളില് നിന്നുള്ള പ്രമുഖര് പങ്കെടുക്കുന്ന ചടങ്ങില് നൃത്താര്ച്ചന, സംഗീതാര്ച്ചന എന്നിവയുള്പ്പെടെയുള്ള കലാസാംസ്കാരിക പരിപാടികള് അരങ്ങേറും. അമ്മയുടെ പിറന്നാള് ആഘോഷങ്ങളില് പങ്കെടുക്കുന്നതിന് ലോകത്തിന്റെ വിവിധ ഭാഗങ്ങളില് നിന്നും ഭക്തജനങ്ങള് ആശ്രമത്തിലേക്ക് എത്തിക്കൊണ്ടിരിക്കുന്നു.
പിറന്നാള് ആഘോഷങ്ങളുടെ പ്രധാന നടത്തിപ്പു കേന്ദ്രമായ അമൃതപുരി കാമ്പസില് നിര്മിക്കുന്ന പടുകൂറ്റന് പന്തലിന്റെ പണിയും രണ്ടു ദിവസത്തിനകം പൂര്ത്തിയാകും. ഒരുലക്ഷം പേരെ ഉള്ക്കൊള്ളുന്ന പന്തലാണ് നിര്മിക്കുന്നത്. പിറന്നാള് ദിവസം ഇവിടെ എത്തിച്ചേരുന്ന മുഴുവന്പേര്ക്കും മൂന്നു നേരം ഭക്ഷണം ഒരുക്കാനും, വാഹനം പാര്ക്കു ചെയ്യാനുമുള്ള സജ്ജീകരണങ്ങളും തയാറായി വരുന്നു.
പിറന്നാളില് പങ്കെടുക്കുന്നതിന് പ്രത്യേക ക്ഷണിതാക്കളായി ആരുമില്ലെങ്കിലും, കേന്ദ്രമന്ത്രിമാരും വിവിധ സംസ്ഥാനങ്ങളിലെ മന്ത്രിമാരും ഉള്പ്പെടെ നിരവധി പ്രമുഖര് പങ്കെടുക്കും. ഈ വര്ഷത്തെ അമൃതകീര്ത്തി പുരസ്കാരം എഴുത്തുകാരനും, പ്രഭാഷകനുമായ പി.ആര്. നാഥിന് സമ്മാനിക്കും. കൂടാതെ സമൂഹവിവാഹം, പുതിയ പ്രസിദ്ധീകരണങ്ങളുടെ പ്രകാശനം, ജീവകാരുണ്യ പ്രവര്ത്തനങ്ങളുടെയും സൗജന്യ ചികിത്സാ പദ്ധതികളുടെയും തുടക്കം ഉള്പ്പെടെ അമ്മയുടെ പിറന്നാളിനോട് അനുബന്ധിച്ച് നടത്തപ്പെടും. അമ്മയുടെ പിറന്നാളിനെ വരവേല്ക്കാന് അമൃതപുരിയും സമീപ പ്രദേശങ്ങളും തയാറെടുക്കുന്നതിന്റെ ദൃശ്യങ്ങളാണ് വള്ളിക്കാവിലെങ്ങും.
