ചെന്നൈ:പ്രശസ്ത വിനോദ സഞ്ചാര കേന്ദ്രമായ വാല്പ്പാറയില് നവംബര് 1 മുതല് ഇ-പാസ് സംവിധാനം ഏര്പ്പെടുത്താന് മദ്രാസ് ഹൈക്കോടതി സംസ്ഥാന സര്ക്കാരിന് നിര്ദ്ദേശം നല്കി. പശ്ചിമഘട്ടത്തിന്റെ ഭാഗമായ വാല്പ്പാറയുടെ പരിസ്ഥിതി സംരക്ഷണം മുന്നിര്ത്തിയാണ് ഇ-പാസ് ഏര്പ്പെടുത്തുന്നത്.
പ്രധാന എന്ട്രി, എക്സിറ്റ് പോയിന്റുകളില് ചെക്ക് പോസ്റ്റുകള് സ്ഥാപിക്കണമെന്നും കോടതി നിര്ദേശിച്ചിട്ടുണ്ട്. വാല്പ്പാറ, ടോപ്പ് സ്ലിപ്പ്, ആനമല കടുവ സംരക്ഷണ കേന്ദ്രം എന്നിവ സംരക്ഷിക്കപ്പെടേണ്ട ദുര്ബലമായ പാരിസ്ഥിതിക മേഖലകളാണെന്ന് ബെഞ്ച് നിരീക്ഷിച്ചു. വാല്പ്പാറയില് ഇ-പാസ് സംവിധാനം ഏര്പ്പെടുത്തണമെന്ന് അമിക്കസ് ക്യൂറി ടി. മോഹന്, എം. ശാന്തനാരാമന്, ഷെവനന് മോഹന്, രാഹുല് ബാലാജി എന്നിവര് ശുപാര്ശ ചെയ്തിരുന്നു. വാല്പ്പാറയിലെ പരിസ്ഥിതി ലോല മേഖലകളിലേക്ക് നിരോധിത പ്ലാസ്റ്റിക് വസ്തുക്കള് കൊണ്ടുപോകുന്നതും വിലക്കിയിട്ടുണ്ട്. നീലഗിരിയിലെ ഊട്ടിയ്ക്കും കൊടൈക്കനാലിലും പിന്നാലെയാണ് വാല്പ്പാറയിലും ഇ പാസ് സംവിധാനം വരുന്നത്.
