നവരാത്രി ആചരണത്തിന്റെ ആദ്യദിവസം ഭക്തന്മാര് ആരാധിക്കേണ്ടത് ഹിമവാന്റെയും മേനാദേവിയുടെയും മകളായി ജനിച്ച ശൈലപുത്രി അഥവാ പാര്വ്വതി ദേവിയെയാണ്. പരമശിവന്റെ പത്നിയും ദക്ഷപ്രജാപതിയുടെ പുത്രിയുമായ സതീദേവി യാഗഭൂമിയില് അച്ഛനാല് അപമാനിതയായപ്പോള് ദേഹത്യാഗം ചെയ്തു. ക്രോധാവേശനായ പരമശിവന് തന്റെ സമൃദ്ധമായ ജടാഭാരം അഴിച്ച് നിലത്തടിച്ചു. അപ്പോള് വീരഭദ്രനും ഭൂതഗണങ്ങളും ഉണ്ടായി. വീരഭദ്രന് ദക്ഷനെ വധിച്ചു. യാഗം പൂര്ത്തീകരിക്കുവാന് ശിവന്റെ ഉപദേശപ്രകാരം ബ്രഹ്മാവ് ദക്ഷന്റെ കബന്ധത്തില് ആടിന്റെ തല ചേര്ത്ത് അദ്ദേഹത്തെ പുനരുജ്ജീവിപ്പിച്ചു. സതിയുടെ വേര്പാടില് ദുഃഖിതനായ ശിവന് പുനര്വിവാഹിതനാകാന് വിസമ്മതിച്ച് തീവ്രവൈരാഗിയായി മാറി.
പിന്നീട് സതീദേവി പുനര്ജന്മത്തില് പാര്വ്വതിയായി ശിവനെ ഭര്ത്താവായി സ്വീകരിച്ചു. ദാമ്പത്യജീവിതത്തിന്റെ ആദിമാതൃക അര്ദ്ധനാരീശ്വര സങ്കല്പമാണ്. വിവാഹിതരായാല് പിന്നെ ജീവിതത്തില് ദമ്പതികള് വേര്പിരിഞ്ഞ് ജീവിക്കുവാന് പാടില്ല. പുരാണങ്ങളില് വിവാഹമോചനത്തെപ്പറ്റി പരാമര്ശിക്കുന്നില്ല. അതുകൊണ്ടുതന്നെ വിവാഹമോചനം സനാതന ധര്മ്മമനുസരിച്ച് ദോഷമാണ്. ലളിതാസഹസ്രനാമത്തിലെ 634-ാം നാമം ”ശൈലൈന്ദ്രതനയാ” എന്നാണ് (പര്വ്വതരാജപുത്രി). പാര്വ്വതീദേവിയുടെ സ്വരൂപവര്ണ്ണന ശ്രദ്ധിക്കേണ്ടതാണ്.
ഒരു കൈയില് തൃശൂലവും മറ്റേ കൈയില് വിടര്ന്ന താമരയും പിടിച്ചിരിക്കുന്ന ദേവി കേശഭാരത്തില് ചന്ദ്രക്കല അണിഞ്ഞിരിക്കുന്നു. നന്ദി എന്ന കാളയുടെ പുറത്താണ് ദേവി ആസനസ്ഥയായിരിക്കുന്നത്. ദാമ്പത്യജീവിതം സമാധാനപരമായി പര്യവസാനിക്കുവാന് ദമ്പതിമാര് നവരാത്രിയുടെ ആദ്യദിവസം വ്രതമനുഷ്ഠിച്ച് ക്ഷേത്രത്തില് ചെന്ന് ശിവ
പാര്വ്വതിമാരെ ദര്ശിക്കേണ്ടതാണ്. അദ്ധ്യാത്മരാമായണമോ ശിവപുരാണത്തിലെ പാര്വ്വതിസ്വയംവരഭാഗമോ വായിക്കുക. ഉമാമഹേശ്വര സ്തോത്രവും പാരായണം ചെയ്യാവുന്നതാണ്.
ജന്മഭൂമി ഓണ്ലൈന്