മലപ്പുറം: പതിനാലുകാരിയെ പീഡിപ്പിച്ച് അഞ്ചര പവന്റെ സ്വര്ണമാല കൈവശപ്പെടുത്തിയ സംഭവത്തില് യുവാവ് പിടിയിലായി. മണ്ണാര്ക്കാട് സ്വദേശി മനോജിനെ വളാഞ്ചേരി പൊലീസാണ് അറസ്റ്റ് ചെയ്തത്.
കേസിലെ മുഖ്യപ്രതി അജ്മല് നേരത്തെ പൊലീസ് പിടിയിലായിരുന്നു. കഴിഞ്ഞ ജൂലായ് നാലിന് സ്നാപ്പ് ചാറ്റിലൂടെയാണ് അജ്മല് പെണ്കുട്ടിയുമായി സൗഹൃദം സ്ഥാപിച്ചത്.
തന്റെ പിതാവ് സ്വര്ണ വ്യാപാരിയാണെന്നാണ് അജ്മല് പെണ്കുട്ടിയോട് പറഞ്ഞത്.പുതിയ ഡിസൈനിലുളള മാല പണിയിച്ചുതരാമെന്ന് പറഞ്ഞ് കബളിപ്പിച്ചാണ് അജ്മല് പെണ്കുട്ടിയില് നിന്ന് സ്വര്ണം വാങ്ങിയത്.
അജ്മലും മനോജും പെണ്കുട്ടിയെ ലൈംഗികമായും പീഡിപ്പിച്ചു. പ്രതികള്ക്കെതിരെ സ്വര്ണാഭരണം തട്ടിയെടുത്തതിന് പുറമെ പോക്സോ വകുപ്പ് ചുമത്തിയും കേസെടുത്തു. വിവാഹം കഴിക്കാമെന്ന് അജ്മല് പെണ്കുട്ടിയെ വിശ്വസിപ്പിച്ചിരുന്നു.കുട്ടിയുടെ നഗ്നചിത്രങ്ങളും ചോദിച്ച് വാങ്ങി.
പിന്നീടാണ് തന്റെ പിതാവ് സ്വര്ണ വ്യാപാരിയാണെന്നും മാലയുടെ ചിത്രം അയച്ചാല് പുതിയ മോഡലിലുള്ള മാല പണിയിച്ചു നല്കാമെന്നും യുവാവ് വാഗ്ദാനം ചെയ്തത്. കുട്ടി ഒരു മാലയുടെ ചിത്രം അയച്ചു കൊടുത്തെങ്കിലും അത് ചെറുതാണെന്നും വലിയ മാലയാണെങ്കില് അതിലും വലിയ മാല വാങ്ങിച്ചു നല്കാമെന്നും വാഗ്ദാനം ചെയ്തതിനെ തുടര്ന്ന് കുട്ടി അമ്മയുടെ മാല കൈക്കലാക്കി ചിത്രം അയച്ചു കൊടുത്തു. മാല നേരില് കണ്ടാല് മാത്രമേ ഡിസൈന് മനസിലാകൂവെന്ന് യുവാവ് പറഞ്ഞതോടെ പെണ്കുട്ടി വീടിന്റെ ലൊക്കേഷന് അയച്ചുകൊടുത്തു.
വീട്ടിലെത്തിയ അജ്മലിന് പെണ്കുട്ടി മാല നല്കി. അതോടെ പ്രതി മാലയുമായി മുങ്ങി. പിന്നീട് സ്നാപ്ചാറ്റ് അക്കൗണ്ട് ഡിലീറ്റ് ചെയ്ത് യുവാവ് ഒളിവില് പോയി. വഞ്ചിക്കപ്പെട്ടെന്ന് മനസിലായ പെണ്കുട്ടി രക്ഷിതാക്കളോട് വിവരം പറഞ്ഞു. പിന്നാലെ വളാഞ്ചേരി പൊലീസില് പരാതി നല്കി. സിസിടിവി ക്യാമറകള് പരിശോധിച്ചാണ് പ്രതിയെ പിടികൂടിയത്. അജമല് കഴിഞ്ഞ വര്ഷവും സമാനമായ കേസില് പിടിയിലായിരുന്നു.
