ന്യൂദല്ഹി:: തെരഞ്ഞെടുപ്പ് കമ്മീഷന് വോട്ടുകള് മോഷ്ടിച്ച് ബിജെപിയ്ക്ക് നല്കുന്നു എന്ന ആരോപണവുമായി രംഗത്തെത്തിയ രാഹുല് ഗാന്ധി കഴിഞ്ഞ ദിവസം വാര്ത്താസമ്മേളനത്തില് വോട്ട് മോഷണത്തിനെതിരെ കലാപം ചെയ്യാന് യുവതലമുറയോട് ആഹ്വാനം ചെയ്തിരുന്നു. എന്നാല് രാഹുല് ഗാന്ധിയുടെ ആഹ്വാനം കാറ്റില് പറത്തി ജെന് സീ എന്നറിയപ്പെടുന്ന പുത്തന് തലമുറ എബിവിപിയ്ക്ക് വോട്ട് ചെയ്ത് ദല്ഹിയിലെ പ്രധാന സര്വ്വകലാശാലകളില് അധികാരം പിടിച്ചത് ബിജെപിയ്ക്ക് ഉണര്വ്വായി. 1997നും 2012നും ഇടയില് ജനിച്ചവരായ ജെന് സീ തലമുറ എന്തായാലും എബിവിപിയോട് പക്ഷപാതിത്വം പ്രകടിപ്പിച്ചിരിക്കുന്നു എന്നതിന് തെളിവാണ് എബിവിപിയുടെ ഈ ചരിത്ര ജയം.
രാഹുല് ഗാന്ധിയുടെ കലാപാഹ്വാനമല്ല, ബിജെപിയുടെ ഇന്ത്യയെ കാക്കുന്ന ഭരണമാണ് ഇഷ്ടമെന്ന് ദല്ഹിയിലെ കാമ്പസുകള് തെളിയിച്ചിരിക്കുന്നു. കാലാകാലം ഇടത് പക്ഷ സംഘടനകള്ക്കൊപ്പം നിന്നിരുന്ന ജെഎന്യു കഴിഞ്ഞ മാസം എബിവിപി പിടിച്ചെടുത്തിരുന്നു. ആകെയുള്ള 44 കൗണ്സിലര് സീറ്റുകളില് 23 എണ്ണവും എബിവിപി നേടിയത് നിസ്സാര ജയമല്ല. വര്ഷങ്ങളായുള്ള ഇടത് കോട്ടയാണ് എബിവിപി പൊളിച്ചത്. ഏഴ് സീറ്റുകള് മാത്രമാണ് ഡിഎസ് എഫ്, എഐഎസ് ഒ എന്നീ ഇടത് സംഘടനകള് ജെഎന്യുവില് നേടിയത്.
അതിന് പിന്നാലെയാണ് ഇപ്പോള് ഡിയു എന്ന് അറിയപ്പെടുന്ന ദല്ഹി യൂണിവേഴ്സിറ്റിയില് എബിവിപി ചരിത്ര വിജയം നേടിയത്. ഏറെ പ്രതീക്ഷയുണര്ത്തുന്നതാണ് ജെന് സീയുടെ എബിവിപിയോടുള്ള ഈ ചായ് വ്. ആര്എസ്എസിന്റെ വിദ്യാര്ത്ഥി വിഭാഗമാണ് എബിവിപി. എബിവിപിയില് നിന്നുള്ളവരാണ് പിന്നീട് ബിജെപിയുടെ യുവജനവിഭാഗമായ ബിജെവൈഎം (ഭാരതീയ ജനതാ യുവ മോര്ച്ച) എന്ന സംഘടനയിലേക്ക് പലപ്പോഴും കടന്നു വരുന്നത്. പണ്ടത്തെ ബിജെപി നേതാവും കേന്ദ്രമന്ത്രിയുമായ അരുണ് ജെയ്റ്റ്ലി, ദല്ഹി മുഖ്യമന്ത്രി രേഖാ ഗുപ്ത എന്നിവര് ദല്ഹി കാമ്പസിലെ എബിവിപിയില് നിന്നും ബിജെപിയിലേക്ക് എത്തിയവരാണ്.
രാഹുല് ഗാന്ധി വേണ്ടത്ര തെളിവുകള് ഇല്ലാതെ തെരഞ്ഞെടുപ്പ് കമ്മീഷനെ ആക്രമിക്കുന്നതില് കോണ്ഗ്രസിനുള്ളില് തന്നെ വിയോജിപ്പുണ്ട്. കഴിഞ്ഞ ദിവസത്തെ വാര്ത്താസമ്മേളനം നടത്തി തെരഞ്ഞെടുപ്പ് കമ്മീഷനെതിരെ വോട്ട് മോഷണ ആരോപണം ഉന്നയിക്കുമ്പോള് രാഹുല് ഗാന്ധിയുടെ മനസ്സില് നേപ്പാളിലേതുപോലെ ഒരു ജെന് സീ കലാപമാണ് ഒളിഞ്ഞിരിക്കുന്നതെന്ന് വ്യക്തം. എന്തായാലും കലാപത്തിന് ജെന് സീയെ കിട്ടുമെന്ന രാഹുല് ഗാന്ധിയുടെ മോഹം നടക്കില്ലെന്ന് ദല്ഹി തെളിയിച്ചിരിക്കുന്നു. ഒരു പക്ഷെ കലാപത്തിന് രാഹുല് ഗാന്ധിയ്ക്കൊപ്പം ഖലിസ്ഥാന് വാദികളും ഇസ്ലാമിക തീവ്രവാദികളും ചില ഇടത് തീവ്ര സംഘടനകളും നിന്നേയ്ക്കാം. അവരെ എങ്ങിനെ നേരിടാമെന്ന് കേന്ദ്രസര്ക്കാരിനറിയാം. കാരണം കഴിഞ്ഞ ഏതാനും വര്ഷങ്ങളായി കര്ഷക സരമം, പൗരത്വ വിരുദ്ധ പ്രക്ഷോഭം, കശ്മീരിലും യുപിയിലും പ്രായപൂര്ത്തിയാകാത്ത പെണ്കുട്ടികളെ കൂട്ടബലാത്സംഗം ചെയ്ത കേസുകള് സര്ക്കാരിനെതിരായ കലാപമാക്കി മാറ്റാനുള്ള ശ്രമം…തുടങ്ങി എല്ലാ കലാപങ്ങളേയും സമര്ത്ഥമായി അമര്ച്ച ചെയ്തിട്ടുണ്ട് കേന്ദ്രസര്ക്കാര്.
