തിരുവനന്തപുരം: ലോക ചക്രവർത്തി ചമയുന്ന ഡൊണാൾഡ് ട്രംപിന് തക്ക മറുപടി നൽകിയ പ്രധാനമന്ത്രി നരേന്ദ്ര മോദിക്ക് കവിയും ഗാനരചയിതാവുമായ ശ്രീകുമാരൻ തമ്പിയുടെ അഭിനന്ദനം. ഓപ്പറേഷൻ സിന്ദൂർ വഴി അതിർത്തിക്കിപ്പുറം വന്ന തീവ്രവാദത്തെ സൈന്യംകൊണ്ട് മറുപടി നൽകിയതിനും ജന്മദിനാശംസകളുമായി ശ്രീകുമാരൻ തമ്പി ഫേസ് ബുക്കിൽ ആശംസയറിയിച്ചു.
സന്ദേശം ഇങ്ങനെ: ”താൻ ലോക ചക്രവർത്തി ആണെന്ന് വിശ്വസിക്കുന്ന അമേരിക്കൻ പ്രസിഡന്റ് ഡൊണാൾഡ് ട്രംപിന് ഉചിതമായ മറുപടി നൽകി നമ്മുടെ രാജ്യത്തിൻറെ അഭിമാനം കാത്തുസൂക്ഷിക്കുന്ന ആദരണീയ പ്രധാനമന്ത്രി ശ്രീ നരേന്ദ്ര മോദിക്ക് എന്റെ ഹൃദയം നിറഞ്ഞ ജന്മദിനാശംസകൾ. അദ്ദേഹത്തിന് ആയുരാരോഗ്യസൗഖ്യം നേരുന്നു. ”ഓപ്പറേഷൻ സിന്ദൂർ” എന്ന സൈനിക നടപടിയിലൂടെ അതിർത്തി ഭേദിച്ചെത്തിയ തീവ്രവാദത്തെ ചെറുക്കുകയും അതോടൊപ്പം നമ്മുടെ രാജ്യത്തിൻറെ അതിർത്തി സംരക്ഷണം വർധിപ്പിക്കുന്നതിനുള്ള പ്രവർത്തനങ്ങളിൽ നിതാന്ത ജാഗ്രത പുലർത്തുകയും ചെയ്യുന്ന അദ്ദേഹത്തിന്റെ ധിഷണാശക്തിയെ യഥാർത്ഥ ഇന്ത്യക്കാരന് അഭിനന്ദിക്കാതിരിക്കാനാവില്ല..”
