കൊച്ചി: അതിവേഗ റെയില് ഗതാഗത സംവിധാനമായ റീജിയണല് റാപ്പിഡ് ട്രാന്സിറ്റ് സിസ്റ്റം (ആര്ആര്ടിസി) നടപ്പിലാക്കുന്നതുമായി ബന്ധപ്പെട്ട് കേരളം ഡിപിആര് സമര്പ്പിച്ചാല് കേന്ദ്രം സഹകരിക്കുമെന്ന് കേന്ദ്ര നഗരകാര്യ വകുപ്പ് മന്ത്രി മനോഹര്ലാല് ഖട്ടര്. കൊച്ചിയില് കേരള അര്ബന് കോണ്ക്ലേവില് മുഖ്യാതിഥിയായി പങ്കെടുത്തു സംസാരിക്കുകയായിരുന്നു അദ്ദേഹം. റാപ്പിഡ് ട്രെയിന് പദ്ധതിയുടെ കാര്യം മുഖ്യമന്ത്രി പിണറായി വിജയന് ശ്രദ്ധയില്പ്പെടുത്തിയെന്നും അദ്ദേഹം പറഞ്ഞു.
പ്രാദേശികം, സംസ്ഥാനം, കേന്ദ്രം എന്നിങ്ങനെ പദ്ധതികളെ വേര്തിരിക്കരുത്. നഗര വികസന സംരംഭങ്ങളുടെ വിജയത്തിനായി സര്ക്കാരിന്റെ എല്ലാ തലങ്ങളും ഒരുമിച്ച് പ്രവര്ത്തിക്കണം. കൊച്ചി മെട്രോ, വാട്ടര് മെട്രോ പദ്ധതികള് വിജയകരമായി പ്രവര്ത്തിച്ചുകൊണ്ടിരിക്കുകയാണ്. കൊച്ചി മെട്രോയുടെ വികസന പദ്ധതികളും നടന്നുവരുന്നു. ഈ പദ്ധതികളിലെല്ലാം കേന്ദ്ര-കേരള സര്ക്കാറുകള് സംയുക്തധാരണയില് സഹകരിച്ചു പ്രവര്ത്തിക്കുകയാണ്. കൊച്ചിയിലും തിരുവനന്തപുരത്തും നടപ്പിലാക്കുന്ന സ്മാര്ട്ട് സിറ്റി പദ്ധതിയിലും ഈ പങ്കാളിത്തവും സഹകരണവുമുണ്ടെന്നും അദ്ദേഹം വ്യക്തമാക്കി.
ലോകത്തിലെ ഏറ്റവും നീളം കൂടിയ ലീനിയര് സിറ്റിയായി മാറാന് സാധ്യതയുള്ള സംസ്ഥാനമാണ് കേരളമെന്നും അദ്ദേഹം പറഞ്ഞു. കാസര്കോട് നിന്ന് തിരുവനന്തപുരം വരെ 700 കിലോമീറ്റര് റോഡിന്റെ ഇരുവശത്തുമായി ഒരു നഗരമായി വികസിക്കാനുള്ള സാധ്യത കേരളത്തിനുണ്ട്. കുറച്ചു വര്ഷങ്ങള്ക്കുള്ളില്ത്തന്നെ കേരളത്തില് 95 ശതമാനം നഗരവത്കരണം പൂര്ത്തിയാകും. സമീപഭാവിയില്ത്തന്നെ രാജ്യത്തെ ഏറ്റവും നഗരവത്കരിച്ച സംസ്ഥാനമായി കേരളം മാറുമെന്നും അദ്ദേഹം പറഞ്ഞു. ദുബായ്, സിംഗപ്പൂര്, ലണ്ടന്, വാഷിങ്ടണ് പോലെയുള്ള നിലവാരത്തിലുള്ള നഗരങ്ങള് ഭാരതത്തില് വളര്ന്നു വരികയാണ്. ഈ മത്സരത്തില് കേരളവും പങ്കാളിയാകണം. ഏറ്റവും മികച്ച നഗരങ്ങളുടെ കാര്യത്തില് രാജ്യത്ത് ഒന്നാം സ്ഥാനത്തെത്താന് കേരളത്തിന് കഴിയണമെന്നും അദ്ദേഹം പറഞ്ഞു.
കോണ്ക്ലേവ് മുഖ്യമന്ത്രി പിണറായി വിജയന് ഉദ്ഘാടനം ചെയ്തു. നഗരവല്ക്കരണവുമായി ബന്ധപ്പെട്ട വെല്ലുവിളികള് ഏറ്റെടുക്കുവാനും അവയെ അവസരങ്ങളാക്കി മാറ്റുവാനും കഴിയണമെന്ന് മുഖ്യമന്ത്രി പറഞ്ഞു. മന്ത്രി എം.ബി. രാജേഷ് അധ്യക്ഷത വഹിച്ചു. ശ്രീലങ്ക നഗരവികസന മന്ത്രി അനുര കരുണതിലക, ദക്ഷിണാഫ്രിക്കയില് നിന്നുള്ള അടിസ്ഥാനസൗകര്യ എക്സിക്യൂട്ടീവ് കൗണ്സില് അംഗം മാര്ട്ടിന് മെയര്, ഹിമാചല് പ്രദേശ് നഗര വികസന മന്ത്രി വിക്രമാദിത്യ സിങ്, മന്ത്രിമാരായ കെ.എന്. ബാലഗോപാല്, പി. രാജീവ്, കൊച്ചി കോര്പ്പറേഷന് മേയര് അഡ്വ. എം. അനില്കുമാര്, ചീഫ് സെക്രട്ടറി ഡോ. എ. ജയതിലക്, കേരള അര്ബന് പോളിസി കമ്മിഷന് ചെയര്മാന് പ്രൊഫ. എം. സതീഷ് കുമാര്, എംഎല്എമാരായ കെ.എന്. ഉണ്ണികൃഷ്ണന്, കെ.ജെ. മാക്സി, ടി.ജെ. വിനോദ്, കെ. ബാബു, ഉന്നത വിദ്യാഭ്യാസവകുപ്പ് പ്രിന്സിപ്പല് സെക്രട്ടറി ഡോ. ശര്മിള മേരി ജോസഫ്, തദ്ദേശ സ്വയംഭരണ വകുപ്പ് സ്പെഷ്യല് സെക്രട്ടറി ഡോ. അദീല അബ്ദുല്ല, സ്പെഷ്യല് സെക്രട്ടറി ടി.വി. അനുപമ, പ്രിന്സിപ്പല് ഡയറക്ടര് ജെറോമിക് ജോര്ജ്, ജിസിഡിഎ ചെയര്മാന് കെ. ചന്ദ്രന്പിള്ള, ചേംബര് ഓഫ് മുനിസിപ്പല് ചെയര്മാന് എം. കൃഷ്ണദാസ്, മുളവുകാട് പഞ്ചായത്ത് പ്രസിഡന്റ് വി.എസ്. അക്ബര് തുടങ്ങിയവര് ചടങ്ങില് പങ്കെടുത്തു.
