ന്യൂദല്ഹി: വിദേശ യാത്രകളില് കോണ്ഗ്രസ് നേതാവും ലോക്സഭാ പ്രതിപക്ഷ നേതാവുമായ രാഹുല് ഗാന്ധി സുരക്ഷാ ചട്ടങ്ങള് ലംഘിക്കുന്നതായി സിആര്പിഎഫ്. ഇത്തരം കാര്യങ്ങള് വിവിഐപി സുരക്ഷാ ക്രമീകരണങ്ങളുടെ കാര്യക്ഷമതയെ ദുര്ബലപ്പെടുത്തുമെന്നും രാഹുലിനെ അപകട സാധ്യതകളിലേക്കു നയിച്ചേക്കാമെന്നും സിആര്പിഎഫ് പറയുന്നു. രാഹുല് സുരക്ഷാ ചട്ടങ്ങള് ലംഘിക്കുന്നതായി കാണിച്ചു കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയ്ക്കാണ് സിആര്പിഎഫ് കത്തയച്ചത്. രാഹുലിനും കത്ത് നല്കിയിട്ടുണ്ട്. ഭാവി യാത്രകളില് സുരക്ഷാ ചട്ടങ്ങള് പാലിക്കണമെന്നും ഇരുനേതാക്കള്ക്കും നല്കിയ കത്തില് ചൂണ്ടിക്കാട്ടുന്നു.
രാഹുല് ആരെയും അറിയിക്കാതെ വിദേശ യാത്രകള് നടത്തുന്നെന്നും സുരക്ഷയെ ഗൗരവമായി കാണുന്നില്ലെന്നും സിആര്പിഎഫ് കത്തിലുണ്ട്. യെല്ലോ ബുക്ക് പ്രോട്ടോക്കോള് പ്രകാരം ഉയര്ന്ന സുരക്ഷാ സംവിധാനമുള്ളവര് വിദേശ യാത്രകള് ഉള്പ്പെടെ എല്ലാ നീക്കങ്ങളെക്കുറിച്ചും അവരുടെ സുരക്ഷാ വിഭാഗത്തെ മുന്കൂട്ടി അറിയിക്കണം. അതുവഴി മതിയായ സുരക്ഷാക്രമീകരണങ്ങളൊരുക്കാന് കഴിയും. എന്നാല് രാഹുല് ഇതൊക്കെ സ്ഥിരമായി ലംഘിക്കുന്നെന്നും കത്തിലുണ്ട്. ഇറ്റലി (ഡിസംബര് 30 മുതല് ജനുവരി ഒമ്പതു വരെ), വിയറ്റ്നാം (മാര്ച്ച് 12 മുതല് 17 വരെ), ദുബായ് (ഏപ്രില് 17 മുതല് 23 വരെ), ഖത്തര് (ജൂണ് 11 മുതല് 18 വരെ), ലണ്ടന് (ജൂണ് 25 മുതല് ജൂലൈ ആറു വരെ), മലേഷ്യ (സപ്തം. നാലു മുതല് എട്ടു വരെ) തുടങ്ങിയ രാജ്യങ്ങളിലേക്കുള്ള രാഹുലിന്റെ യാത്രകളെക്കുറിച്ചും കത്തിലുണ്ട്.
