വാഷിംഗ്ടണ്: ലോകത്തിലെ ഏറ്റവും വലിയ സമ്പന്നൻ എന്ന പദവി ഇലോൺ മസ്കിൽ നിന്നും നഷ്ടപ്പെട്ടു. ഓറക്ക്ൾ സഹസ്ഥാപകൻ ലാറി എലിസൺ ആണ് ഇനി ലോകത്തിലെ ഏറ്റവും വലിയ ധനികൻ. ഏകദേശം ഒരു വർഷത്തോളം ലോകത്തിലെ ഏറ്റവും വലിയ ധനികൻ എന്ന സ്ഥാനം മസ്കിന് സ്വന്തമായിരുന്നു.
ചൊവ്വാഴ്ച വൈകുന്നേരം പുറത്തുവന്ന ഒറാക്കിളിന്റെ വരുമാന റിപ്പോർട്ട് പ്രകാരം, എലിസൺ്റെ സമ്പത്ത് 101 ബില്യൺ ഡോളർ ഉയർന്ന് 393 ബില്യൺ ഡോളറായി. ഇതോടെ മസ്കിന്റെ 385 ബില്യൺ ഡോളറിനെ പിന്നിലാക്കി എലിസൺ ലോകത്തിലെ ഒന്നാം സ്ഥാനത്തെ സമ്പന്നനായി. ഒറ്റ ദിവസം കൊണ്ട് അദ്ദേഹത്തിന്റെ ആസ്തിയിൽ 101 ബില്യൺ ഡോളർ വർധനവാണുണ്ടായത്.
ബ്ലൂംബെർഗ് ബില്യണയേഴ്സ് സൂചിക പ്രകാരം, ന്യൂയോർക്കിൽ കഴിഞ്ഞദിവസം
രാവിലെ 10:10 ലെ കണക്കനുസരിച്ച്, എലിസണിന്റെ സമ്പത്ത് 393 ബില്യൺ ഡോളറായിരുന്നു. ഒറാക്കിളിന്റെ സഹസ്ഥാപകനും ഇപ്പോൾ ചെയർമാനും ചീഫ് ടെക്നോളജി ഓഫീസറുമായ 81കാരനായ എലിസണിന്റെ ആസ്തിയുടെ ഭൂരിഭാഗവും ഡാറ്റാബേസ് സോഫ്റ്റ്വെയർ കമ്പനിയിലാണ്.
ഈ വർഷം ഇതിനകം 45 ശതമാനം നേട്ടമുണ്ടാക്കിയ ഒറാക്കിളിന്റെ ഓഹരികൾ ബുധനാഴ്ച 41 ശതമാനമായി ഉയർന്നു. ലോകത്തിലെ ഏറ്റവും ധനികനെന്ന പദവി ഏകദേശം ഒരുവർഷത്തോളം കാലം മസ്കിന് സ്വന്തമായിരുന്നു. 2021ൽ തന്നെ എൽവിഎംഎച്ച് സിഇഒ ബെർണാഡ് അർനോൾട്ടിനോടും 2024 ൽ ആമസോൺ സ്ഥാപകൻ ജെഫ് ബെസോസിനോടും മസ്കിന് ഈ പദവി നഷ്ടപ്പെട്ടിരുന്നു. എങ്കിലും കഴിഞ്ഞ വർഷം അദ്ദേഹം അത് തിരിച്ചുപിടിച്ചു.
