കൊച്ചി:മഞ്ഞുമ്മല് ബോയ്സ് സിനിമയുടെ ലാഭ വിഹിതവുമായി ബന്ധപ്പെട്ട വഞ്ചനാക്കേസില് ജാമ്യ വ്യവസ്ഥയില് ഇളവ് തേടിയുള്ള നടന് സൗബിന് ഷാഹിറിന്റെ ഹര്ജി ഹൈക്കോടതി തള്ളി. വിചാരണ കോടതിയുടെ നടപടി ചോദ്യം ചെയ്താണ് നടന് ഹൈക്കോടതിയെ സമീപിച്ചത്.
പാസ്പോര്ട്ട് വിട്ടുനല്കണമെന്നും വിദേശത്ത് പോകാന് അനുവദിക്കണമെന്നുമുള്ള ആവശ്യവും ഹൈക്കോടതി തള്ളി. മഞ്ഞുമ്മല് ബോയ്സ് സിനിമയുടെ നിര്മ്മാണവുമായി ബന്ധപ്പെട്ട് ലാഭവിഹിതം വാഗ്ദാനം ചെയ്ത് തട്ടിപ്പ് നടത്തിയെന്ന കേസില് സൗബിന് ഷാഹിറിനെ നേരത്തെ മരട് പൊലീസ് അറസ്റ്റ് ചെയ്തിരുന്നു. കേസില് നടന് ഹൈക്കോടതി നേരത്തേ മുന്കൂര് ജാമ്യം അനുവദിച്ചിരുന്നു.
അതേസമയം, മഞ്ഞുമ്മല് ബോയ്സ് സിനിമയുമായി ബന്ധപ്പെട്ട വഞ്ചനാക്കേസില് പ്രതികളെ സഹായിച്ചെന്ന ആരോപണത്തെ തുടര്ന്ന് മരട് എസ്ഐ കെ കെ സജീഷിനെ എറണാകുളം വെസ്റ്റ് ട്രാഫിക് സ്റ്റേഷനിലേക്ക് സ്ഥലം മാറ്റിയിട്ടുണ്ട്. നടന് ഉള്പ്പെട്ട കേസില് ബാങ്ക് ഇടപാടുകളുടെ പ്രധാന രേഖകള് ഫയലില് നിന്നെടുത്തു മാറ്റിയതിനെ തുടര്ന്നാണ് നടപടി. കേസിലെ പുരോഗതി വിലയിരുത്താന് ഫയല് വിളിച്ചുവരുത്തി ഡിസിപി പരിശോധിച്ചപ്പോഴാണ് ക്രമക്കേട് കണ്ടെത്തിയത്.
മഞ്ഞുമ്മല് ബോയ്സ് സിനിമ നിര്മ്മിക്കാന് പ്രതികള് 40 ശതമാനം ലാഭവിഹിതം വാഗ്ദാനം ചെയ്ത് ഏഴ് കോടി രൂപ തട്ടിയെടുത്തുവെന്നാണ് കേസ്. സിനിമയ്ക്ക് വേണ്ടി ഏഴ് കോടി രൂപ മുടക്കിയ തനിക്ക് മുടക്കുമുതലും ലാഭവിഹിതവും നല്കിയില്ലെന്ന് കാട്ടി അരൂര് സ്വദേശി സിറാജ് നല്കിയ പരാതിയിലാണ് പൊലീസ് കേസ് രജിസ്റ്റര് ചെയ്ത് അന്വേഷണം നടത്തിയത്.
സൗബിന് ഷാഹിര്, ബാബു ഷാഹിര്, ഷോണ് ആന്റണി എന്നിവര്ക്കെതിരെ മരട് പൊലീസ് രജിസ്റ്റര് ചെയ്ത കേസില് മൂവര്ക്കും ഹൈക്കോടതി മുന്കൂര് ജാമ്യം നല്കിയിരുന്നു. ചിത്രത്തിന്റെ നിര്മ്മാതാക്കള് നടത്തിയത് മുന്കൂട്ടി ആസൂത്രണം ചെയ്തുള്ള തട്ടിപ്പ് ആയിരുന്നുവെന്നാണ് പൊലീസ് സമര്പ്പിച്ച അന്വേഷണ റിപ്പോര്ട്ടിലുള്ളത്. പ്രതികള്ക്ക് ജാമ്യം നല്കിയതിനെതിരെ സുപ്രീംകോടതിയില് ഹര്ജി സമര്പ്പിച്ചിട്ടുണ്ട്.
