തൃശൂര്: കമ്യൂണിസത്തിനും കമ്യൂണിസ്റ്റ് മാനിഫെസ്റ്റോക്കും എത്രയോ നൂറ്റാണ്ടുകള്ക്ക് മുന്പ് ഭാരതത്തില് എഴുതപ്പെട്ട ഈശാവാസ്യ ഉപനിഷത്ത് സമൂഹ താത്പര്യത്തെക്കരുതി ജീവിക്കണമെന്ന് പഠിപ്പിച്ചതായി പ്രശസ്ത എഴുത്തുകാരന് സി. രാധാകൃഷ്ണന്.
ആവശ്യമുള്ളത് മാത്രമെടുത്ത് ബാക്കി സമൂഹത്തിന് നല്കി ത്യാഗബുദ്ധിയോടെ ജീവിക്കാനാണ് ഉപനിഷത്ത് പഠിപ്പിച്ചത്. കമ്യൂണിസ്റ്റ് മാനിഫെസ്റ്റോയിലും മൂലധനത്തിലും ഉപനിഷത്തുകളില് പറഞ്ഞ അതേ ലക്ഷ്യം ഉണ്ടായിരുന്നു. പക്ഷേ കമ്യൂണിസത്തിന്റെ മാര്ഗം പിഴച്ചു പോയി. അതുകൊണ്ടാണ് പരീക്ഷിച്ച എല്ലായിടത്തും അത് പരാജയപ്പെട്ടതും പ്രശ്നങ്ങള് മാത്രം സൃഷ്ടിച്ചതും. ലക്ഷ്യം മാത്രമല്ല മാര്ഗവും ശരിയാകണം. ആധ്യാത്മികതയിലുറച്ച നൈതികബോധമാണ് ലോകത്തെ മുന്നോട്ടു നയിക്കാനുള്ള ഏകമാര്ഗം. ശ്രീകൃഷ്ണ വിചാരങ്ങള് പ്രചരിപ്പിക്കുന്ന ബാലഗോകുലത്തോട് എന്നും മമതയുണ്ടെന്നും സി. രാധാകൃഷ്ണന് പറഞ്ഞു. ബാലഗോകുലം ബാലസംസ്കാര കേന്ദ്രത്തിന്റെ ജന്മാഷ്ടമി പുരസ്കാരം തൃശൂര് ടൗണ്ഹാളില് ഏറ്റുവാങ്ങി സംസാരിക്കുകയായിരുന്നു അദ്ദേഹം.
പ്രശസ്ത കവിയും ചലച്ചിത്രകാരനുമായ ശ്രീകുമാരന് തമ്പി ജന്മാഷ്ടമി പുരസ്കാരം സി. രാധാകൃഷ്ണന് സമ്മാനിച്ചു. എല്ലാ കഥാപാത്രങ്ങളെയും ജീവിത സന്ദര്ഭങ്ങളെയും അങ്ങേയറ്റത്തെ കാരുണ്യത്തോടെയാണ് സി. രാധാകൃഷ്ണന് സമീപിച്ചതെന്നും അദ്ദേഹത്തിന്റെ രചനകളുടെ ഏറ്റവും വലിയ സവിശേഷത ഈ കാരുണ്യ ദര്ശനമാണെന്നും ശ്രീകുമാരന് തമ്പി ചൂണ്ടിക്കാട്ടി. എഴുത്തച്ഛനെ വ്യക്തി എന്ന നിലയില് പരിചയപ്പെടുത്തിയ അപൂര്വ രചനയാണ് രാധാകൃഷ്ണന്റെ തീക്കടല് കടഞ്ഞ് തിരുമധുരം. അതിന് മുന്പോ ശേഷമോ അത്തരമൊരു രചന മലയാളത്തില് ഉണ്ടായിട്ടില്ല, ശ്രീകുമാരന് തമ്പി പറഞ്ഞു.
ധര്മം എന്ന പ്രപഞ്ചതാളത്തെ എഴുത്തില് സന്നിവേശിപ്പിച്ച സാഹിത്യകാരനാണ് സി. രാധാകൃഷ്ണനെന്ന് അനുഗ്രഹപ്രഭാഷണം നടത്തിയ സ്വാമി ചിദാനന്ദപുരി പറഞ്ഞു. ഡോ. എം ലക്ഷ്മികുമാരി അധ്യക്ഷയായിരുന്നു. ബാലസംസ്കാര കേന്ദ്രം ചെയര്മാന് പി.കെ. വിജയരാഘവന്, ബാലഗോകുലം അധ്യക്ഷന് ആര്. പ്രസന്നകുമാര്, സാഹിത്യ അക്കാദമി മുന് സെക്രട്ടറി ഡോ. പി.വി. കൃഷ്ണന് നായര്, എന്. ഹരീന്ദ്രന് മാസ്റ്റര്, എം.പി. സുബ്രഹ്മണ്യ ശര്മ, വി.എന്. ഹരി എന്നിവര് സംസാരിച്ചു.
