ന്യൂദല്ഹി: അമേരിക്കയുടെ താരിഫ് ഉയര്ത്തല് ഭീഷണിക്കിടയിലും കൂടുതല് ലോകരാജ്യങ്ങളുമായി കരാറുകള്ക്ക് ഭാരതം. ഇസ്രയേലുമായുള്ള ഉഭയകക്ഷി നിക്ഷേപ കരാറില് ഇന്നലെ ഭാരതം ഒപ്പുവച്ചു. യൂറോപ്യന് യൂണിയനുമായുള്ള സ്വതന്ത്ര വ്യാപാരകരാര് നടപ്പാക്കുന്നതുമായി ബന്ധപ്പെട്ട നിര്ണായക ചര്ച്ചകള്ക്ക് വരുംദിവസങ്ങളില് രാജ്യതലസ്ഥാനം വേദിയാകും.
ഇസ്രയേലുമായി ഒപ്പുവച്ച ഉഭയകക്ഷി നിക്ഷേപ കരാര് ഇരുരാജ്യങ്ങളും തമ്മിലുള്ള ബന്ധത്തിലെ ചരിത്രപരമായ നാഴികക്കല്ലാണ്. കേന്ദ്രധനകാര്യമന്ത്രി നിര്മല സീതാരാമനും ഇസ്രയേല് ധനകാര്യമന്ത്രി ബെസലേല് സ്മോട്രിച്ചുമാണ് ഇന്നലെ ന്യൂദല്ഹിയില് കരാറില് ഒപ്പുവച്ചത്. സാമ്പത്തിക സഹകരണം വര്ധിപ്പിക്കുന്നതിനും കൂടുതല് ശക്തവും സ്ഥിരതയുള്ളതുമായ നിക്ഷേപ അന്തരീക്ഷം സൃഷ്ടിക്കുന്നതിനും കരാര് വഴിയൊരുക്കും. നിലവില് 800 മില്യണ് അമേരിക്കന് ഡോളറിന്റെ ഉഭയകക്ഷി നിക്ഷേപങ്ങളാണുള്ളത്. വ്യാപാരത്തിന്റെയും പരസ്പര നിക്ഷേപത്തിന്റെയും വളര്ച്ച സുഗമമാക്കുന്നതിനൊപ്പം തന്നെ മധ്യസ്ഥതയിലൂടെ സ്വതന്ത്ര തര്ക്കപരിഹാര സംവിധാനം ഉറപ്പാക്കുന്നതിനും ഈ കരാര് സഹായിക്കും.
സാമ്പത്തിക സഹകരണം വര്ദ്ധിപ്പിക്കാനും നിക്ഷേപങ്ങള് പ്രോത്സാഹിപ്പിക്കാനും നടപടികളുണ്ടാകുമെന്ന് ഇരുമന്ത്രിമാരും വ്യക്തമാക്കി. സൈബര് സുരക്ഷ, പ്രതിരോധം, നവീകരണം, ഉന്നത സാങ്കേതികവിദ്യ എന്നീ മേഖലകളില് ഇരുരാജ്യങ്ങളും തമ്മില് കൂടുതല് സഹകരണം ആവശ്യമാണെന്ന് ഇസ്രയേല് ധനമന്ത്രി ബെസലേല് സ്മോട്രിച്ച് അഭിപ്രായപ്പെട്ടു. നിര്മല സീതാരാമനെ ഇസ്രയേല് സന്ദര്ശിക്കാനും ബെസലേല് സ്മോട്രിച്ച് ക്ഷണിച്ചു.
യൂറോപ്യന് യൂണിയനുമായി ഈ വര്ഷം അവസാനത്തോടെ സ്വതന്ത്ര വ്യാപാരകരാര് (എഫ്ടിഎ) നടപ്പാക്കുന്നതിന് മുന്നോടിയായുള്ള ചര്ച്ചകള്ക്കാണ് രാജ്യതലസ്ഥാനം വേദിയാവുന്നത്. യൂറോപ്യന് കമ്മിഷന് കാര്ഷിക കമ്മിഷണര് ക്രിസ്റ്റോഫ് ഹാന്സെന്, വ്യാപാര കമ്മിഷണര് മാരോസ് സെഫ്കോവിച്ച് എന്നിവരാണ് കേന്ദ്ര വാണിജ്യ മന്ത്രി പിയൂഷ് ഗോയല്, കൃഷി മന്ത്രി ശിവരാജ് സിങ് ചൗഹാന് എന്നിവരുമായി കൂടിക്കാഴ്ച നടത്തുക. താരിഫ് ഇതര തടസങ്ങള്, വിപണി പ്രവേശനം, പൊതു സംഭരണങ്ങള് തുടങ്ങിയ കൂടുതല് പ്രധാനപ്പെട്ട വിഷയങ്ങളില് ചര്ച്ച ശ്രദ്ധകേന്ദ്രീകരിക്കും.
ഭാരതത്തിന്റെ ഏറ്റവും വലിയ വ്യാപാര പങ്കാളികളില് ഒന്നാണ് യൂറോപ്യന് യൂണിയന്. 2023-24 സാമ്പത്തിക വര്ഷത്തില് ചരക്കുകളിലെ ഉഭയകക്ഷി വ്യാപാരം 135 ബില്യണ് ഡോളറായി ഉയര്ന്നു. വ്യാപാര കരാറിനു പുറമേ, ഭാരതവും യൂറോപ്യന് യൂണിയനും തമ്മില് പുതിയ രാഷ്ട്രീയ-തന്ത്രപരമായ കാഴ്ചപ്പാടുകളും പ്രതിരോധ ബന്ധങ്ങള് ശക്തിപ്പെടുത്തുന്നതിനുള്ള അടിസ്ഥാന ചട്ടക്കൂടുകളും വികസിപ്പിക്കാനുള്ള പരിശ്രമങ്ങളിലാണ്.
