തിരുവനന്തപുരം: പാദവാര്ഷിക പരീക്ഷകള്ക്കു ശേഷം സ്കൂളുകള് വീണ്ടും തുറന്ന സാഹചര്യത്തില്, പഠനത്തില് പിന്നോക്കം നില്ക്കുന്ന കുട്ടികള്ക്ക് പ്രത്യേക പിന്തുണ നല്കാന് പൊതുവിദ്യാഭ്യാസ വകുപ്പ് നിര്ദേശം നല്കി. പരീക്ഷയില് 30 ശതമാനത്തില് താഴെ മാര്ക്ക് നേടിയ കുട്ടികള്ക്ക് പ്രത്യേക പഠനസഹായം നല്കണം. ഇതിനായി സ്കൂളുകള് ആക്ഷന് പ്ലാന് തയ്യാറാക്കണം.
ഈ മാസം 9-നകം മൂല്യനിര്ണയം പൂര്ത്തിയാക്കി ഉത്തരക്കടലാസുകള് വിദ്യാര്ത്ഥികള്ക്ക് വിതരണം ചെയ്യണം. ഇതിനുശേഷം സെപ്റ്റംബര് 10-നും 20-നും ഇടയില് ക്ലാസ് പി.ടി.എ. യോഗങ്ങള് വിളിച്ചുചേര്ക്കണം. സബ്ജക്ട് കൗണ്സില്, സ്കൂള് റിസോഴ്സ് ഗ്രൂപ്പ് എന്നിവയുടെ നേതൃത്വത്തില് അധിക പഠനപിന്തുണ നല്കുന്നതിനുള്ള കാര്യങ്ങള് ആലോചിച്ച് ആക്ഷന് പ്ലാന് തയ്യാറാക്കണം. താഴ്ന്ന ഗ്രേഡുകളിലുള്ള കുട്ടികളുടെ നിലവാരം മനസ്സിലാക്കി ഡയറ്റ്, എസ്.എസ്.കെ, വിദ്യാഭ്യാസ ഓഫീസര്മാര് തുടങ്ങിയവര് സ്കൂളുകളില് നേരിട്ടെത്തി പഠനപിന്തുണ നല്കണം. ഈ പ്രവര്ത്തനങ്ങളുടെ സമഗ്ര റിപ്പോര്ട്ട് എസ്.എസ്.കെ. പൊതുവിദ്യാഭ്യാസ ഡയറക്ടര്ക്ക് നല്കണം.
എ.ഇ.ഒ., ഡി.ഇ.ഒ. എന്നിവര് തങ്ങളുടെ റിപ്പോര്ട്ടുകള് സെപ്റ്റംബര് 25-നകം ഡി.ഡി.ഇ.മാര്ക്ക് കൈമാറണം. ഡി.ഡി.ഇ.മാര് ഈ റിപ്പോര്ട്ടുകള് ക്രോഡീകരിച്ച് സെപ്റ്റംബര് 30-നകം പൊതുവിദ്യാഭ്യാസ ഡയറക്ടര്ക്ക് നല്കണം. നിരന്തര മൂല്യനിര്ണയം കുട്ടികളുടെ കഴിവുകള്ക്കനുസരിച്ച് മാത്രമാണ് നല്കുന്നതെന്ന് ഉറപ്പുവരുത്തണം.
