കാസർകോട്: ഇന്ത്യാ ബുക്ക് ഓഫ് റെക്കോർഡ് നേടിയ വിദ്യാർഥിയെ തൂങ്ങി മരിച്ച നിലയിൽ കണ്ടെത്തി. പടന്നക്കാട് കരുവളം കാരക്കുണ്ട് റോഡ് ശ്രീനിലയത്തിലെ ശ്രീഹരിയെയാണ് (21) മരിച്ച നിലയിൽ കണ്ടെത്തിയത്. കിടപ്പുമുറിയിൽ തൂങ്ങി മരിച്ച നിലയിലായിരുന്നു മൃതദേഹം കണ്ടെത്തിയത്. ഉടൻ തന്നെ കാഞ്ഞങ്ങാട് ജില്ലാ ആശുപത്രിയിൽ എത്തിച്ചെങ്കിലും ഡോക്ടർമാർ മരണം സ്ഥിരീകരിക്കുകയായിരുന്നു. പടന്നക്കാട് നെഹ്റു കോളേജിലെ വിദ്യാർഥിയാണ് ശ്രീഹരി.
ഇന്നലെ രാത്രി എട്ട് മണിയോടെയാണ് ശ്രീഹരിയെ മരിച്ച നിലയിൽ കണ്ടെത്തുന്നത്. നെഹ്റു കോളജിലെ അവസാന വർഷ ബിരുദ വിദ്യാർഥിയായിരുന്നു ശ്രീഹരി. ഒരു വിരലിൽ ഒരു മണിക്കൂർ നേരം നിർത്താതെ പുസ്തകം കറക്കി ഇന്ത്യാ ബുക്ക് ഓഫ് റെക്കോർഡ് നേടിയ ആളായിരുന്നു ശ്രീഹരി. മികച്ച ഒരു കലാപ്രതിഭ കൂടിയായിരുന്നു യുവാവ്. സംഭവത്തിൽ ഹോസ്ദുർഗ് പോലീസ് കേസ് രജിസ്റ്റർ ചെയ്തു. പിതാവ്: പവിത്രൻ അച്ചാംതുരുത്തി, മാതാവ്: ശാന്തി
