ഷില്ലോങ്ങ് : ഇന്ഡോറിലെ വ്യവസായി രാജ രഘുവംശിയെ ഹണിമൂണ് യാത്രയ്ക്കിടെ ഭാര്യയും കാമുകനും ചേര്ന്ന് കൊന്ന് കൊക്കയില് തള്ളിയ സംഭവത്തില് മേഘാലയ പോലീസ് കുറ്റപത്രം സമര്പ്പിച്ചു. കൊല നടത്താന് ഭാര്യ സോനം രഘുവംശിയും രഹസ്യകാമുകന് രാജ് കുശ്വാഹയും മൂന്ന് തവണ ശ്രമം നടത്തിയെന്ന് കുറ്റപത്രത്തില് പറയുന്നു. സംഭവത്തില് മൂന്നു വാടക കൊലയാളികളും പ്രതികളാണ്.
ഹണിമൂണ് യാത്രക്കിടെ രാജയെ കൊലപ്പെടുത്താന് രാജ് കുശ്വാഹയുമായി സോനം ഗൂഢാലോചന നടത്തിയതായി അന്വേഷണത്തില് വ്യക്തമായതായി ഈസ്റ്റ് ഖാസി ഹില്സ് പോലീസ് സൂപ്രണ്ട് പറഞ്ഞു.
ഒന്നാം പ്രതിയായ സോനം രഘുവംശി, ഇന്ഡോറില് വെച്ച് രാജയെ വിവാഹം കഴിച്ചതിനു ശേഷവും രാജ് കുശ്വാഹയുമായുള്ള വഴിവിട്ട ബന്ധം തുടര്ന്നതായി അന്വേഷണ ഉദ്യോഗസ്ഥന് പറഞ്ഞു.
വിവാഹം കഴിഞ്ഞ് വെറും പന്ത്രണ്ട് ദിവസങ്ങള്ക്ക് ശേഷം, സോഹ്റയിലെ വെയ് സൗഡോങ് വെള്ളച്ചാട്ടത്തിന് സമീപം വെച്ച് അക്രമികള് രാജയെ വടിവാള് ഉപയോഗിച്ച് വെട്ടിക്കൊല്ലുകയായിരുന്നു. സോനം സംഭവസ്ഥലത്ത് ഉണ്ടായിരുന്നു. രാജയുടെ മൃതദേഹം പിന്നീട് ഒരു മലയിടുക്കിലേക്ക് വലിച്ചെറിഞ്ഞു.
