തിരുവനന്തപുരം:ജനറല്‍ ആശുപത്രിയിലെ ശസ്ത്രക്രിയ പിഴവില്‍ നെഞ്ചില്‍ ഗൈഡ് വയര്‍ കുടുങ്ങിയ സുമയ്യ വിദഗ്ധ സംഘത്തിന് മുന്നില്‍ മൊഴി നല്‍കി.വിദഗ്ധസമിതി റിപ്പോര്‍ട്ട് വന്ന ശേഷം മുന്നോട്ട് പോകാനാണ് തീരുമാനമെന്ന് സുമയ്യയുടെ സഹോദരന്‍ പറഞ്ഞു.
നെഞ്ചില്‍ കുടുങ്ങിയ ഗൈഡ് വയര്‍ പുറത്തെടുക്കാന്‍ ശ്രമിക്കാമെന്നാണ് പറഞ്ഞിട്ടുള്ളത് .പൂര്‍ണമായും അത് എടുത്ത് മാറ്റാമെന്ന് ആരും ഉറപ്പ് നല്‍കിയിട്ടില്ല. ആന്‍ജിയോഗ്രാം വഴി ഗൈഡ് വയര്‍ നീക്കാന്‍ നോക്കാമെന്നും ഗൈഡ് വയറിന് അനക്കമുണ്ടെങ്കില്‍ പുറത്തെടുക്കാന്‍ ശ്രമിക്കാമെന്നും തുടര്‍പരിശോധനയ്‌ക്ക് ശേഷം അറിയിക്കണമെന്നാണ് ആവശ്യപ്പെട്ടിട്ടുള്ളതെന്നും ബന്ധു പറഞ്ഞു.
എന്നാണ് സി ടി സ്‌കാന്‍ ചെയ്യുക എന്ന കാര്യത്തില്‍ വ്യക്തതയില്ല. എക്‌സ്-റേ അടക്കം ചികിത്സ രേഖകള്‍ വിദഗ്ധസമിതിക്ക് മുന്നില്‍ സമര്‍പ്പിച്ചു. സര്‍ജറിക്ക് അപ്പുറത്തേക്ക് ഒന്നും ഹിയറിംഗില്‍ സംസാരിച്ചില്ല. ഡോക്ടര്‍ക്കെതിരെയുള്ള നടപടിയെ കുറിച്ച് ചര്‍ച്ച നടന്നില്ലെന്നും സുമയ്യയുടെ ബന്ധു പറഞ്ഞു.നെഞ്ചിനകത്ത് കുടുങ്ങിയ ഗൈഡ് വയര്‍ പുറത്തെടുക്കാനുള്ള സംവിധാനം സര്‍ക്കാര്‍ ചെയ്യുമെന്ന് പറഞ്ഞിട്ടുണ്ടെങ്കിലും അതില്‍ ഒരു ഉറപ്പും തങ്ങള്‍ക്കില്ലെന്നും ബന്ധു വെളിപ്പെടുത്തി.
സുമയ്യയും കുടുംബവും മെഡിക്കല്‍ ബോര്‍ഡിന് നല്‍കിയ പരാതി പ്രകാരമാണ് വിദഗ്ധ സമിതി മൊഴിയെടുത്തത്. രണ്ടര വര്‍ഷമായി നേരിടുന്ന ആരോഗ്യ പ്രശ്‌നങ്ങളുടെ തെളിവുകളും സ്വകാര്യ ആശുപത്രിയിലെ ചികിത്സ രേഖകളുമാണ് സുമയ്യ സമിതിക്ക് മുന്നില്‍ ഹാജരാക്കിയത്.2023 ല്‍ നടന്ന തൈറോയിഡ് ശാസ്ത്രക്രിയയിലാണ് സുമയ്യയുടെ നെഞ്ചില്‍ ശാസ്ത്രക്രിയക്ക് ഉപയോഗിച്ച ഗൈഡ് വയര്‍ കുടുങ്ങിയത്.
