രാജാക്കാട്: പോപ്പുലര് ഫ്രണ്ട് പോലുള്ള ചില മത തീവ്രവാദ സംഘടനകള് അവകാശപ്പെടുന്നത് കേരളം അവര് ഭരിക്കുമെന്നാണെന്നും ഇതിന് കൂട്ടുനില്ക്കുന്ന രാഷ്ട്രീയ പാര്ട്ടികള് ഏതായാലും അവര്ക്ക് തെരഞ്ഞെടുപ്പില് കനത്ത വില നല്കേണ്ടിവരുമെന്നും എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്. എന്ആര് സിറ്റിയില് നേതൃസംഗമം ഉദ്ഘാടനം ചെയ്യുകയായിരുന്നു അദ്ദേഹം. ശരി അത്ത് പോലുള്ള ദുരാചാരങ്ങള് നടപ്പാക്കുകയും ഭരണഘടനക്ക് വിരുദ്ധവുമായി പ്രവര്ത്തിക്കുകയും ചെയ്യുന്ന മത തിന്മകള്ക്കെതിരെ താന് സംസാരിച്ചാല് അതിനെ വര്ഗീയമായി ചിത്രീകരിക്കുകയാണ് ചിലര്.
തീയില് കുരുത്തതാണ് താന്, അയ്യപ്പനെ വിവാദങ്ങളിലേക്ക് വലിച്ചിഴക്കരുത്. സംഗമം നടത്തുന്നത് ലോകമാകെ അയ്യപ്പന്റെ പ്രസക്തി വര്ദ്ധിപ്പിക്കുമെന്നും സംസ്ഥാനത്തിന്റെ വരുമാനം വിവിധ മാര്ഗങ്ങളിലൂടെ വര്ദ്ധിക്കുമെന്നും വെള്ളാപ്പള്ളി പറഞ്ഞു. എന്നാല് ഇപ്പോള്ത്തന്നെ സൗകര്യങ്ങള് പരിമിതമായ ശബരിമലയില് അയ്യപ്പന്മാര്ക്ക് സൗകര്യങ്ങളൊരുക്കി നിലവിലെ ബുദ്ധിമുട്ടുകള് പരിഹരിക്കുന്നതിന് സര്ക്കാര് നിലപാട് സ്വീകരിക്കണമെന്നും അദ്ദേഹം പറഞ്ഞു.
യോഗം വൈസ് പ്രസിഡന്റ് തുഷാര് വെള്ളാപ്പള്ളി മുഖ്യ പ്രഭാഷണം നടത്തി. രാജാക്കാട് യൂണിയന് പ്രസിഡന്റ് എം.ബി. ശ്രീകുമാര് അധ്യക്ഷനായി. ദേവസ്വം സെക്രട്ടറി അരയക്കണ്ടി സന്തോഷ് സംഘടനാ സന്ദേശം നല്കി. യോഗം അസി. സെക്രട്ടറി കെ.ഡി.രമേശ്, നെടുംകണ്ടം യൂണിയന് പ്രസിഡന്റ് സജി പറമ്പത്ത്, രാജാക്കാട് യൂണിയന് സെക്രട്ടറി കെ.എസ്. ലതീഷ് കുമാര്, നെടുങ്കണ്ടം യൂണിയന് സെക്രട്ടറി സുധാകരന് ആരിപ്ലാക്കല് തുടങ്ങിയവര് സംസാരിച്ചു.
