ബെംഗളൂരു:ക്ഷേത്രങ്ങള് മതേതര ഇടമല്ലെന്നും ഹിന്ദുക്കളുടേതാണെന്നും കേന്ദ്രമന്ത്രി ശോഭ കരാന്ത് ലജെ. മൈസൂര് ദസറ ഉത്സവം എഴുത്തുകാരി ഭാനു മുഷ്താഖിനെക്കൊണ്ട് ഉദ്ഘാടനം ചെയ്യിക്കാനുള്ള കര്ണ്ണാടകയിലെ കോണ്ഗ്രസ് സര്ക്കാരിന്റെ തീരുമാനത്തിനെതിരെ ആഞ്ഞടിക്കുകയായിരുന്നു മന്ത്രി.
ചാമുണ്ഡീദേവിയും ചാമുണ്ഡീക്ഷേത്രവും ഹിന്ദുക്കളുടേത് മാത്രമല്ലെന്ന കര്ണ്ണാടക ഉപമുഖ്യമന്ത്രി ഡി.കെ. ശിവകുമാറിന്റെ പ്രസ്താവന അധിക്ഷേപകരമാണെന്നും ശോഭ കരാന്ത് ലജെ പറഞ്ഞു. കോണ്ഗ്രസ് ഹൈക്കമാന്റിനെ തൃപ്തിപ്പെടുത്താനാണ് ശിവകുമാറിന്റെ ശ്രമം. നേരത്തെ കര്ണ്ണാടക നിയമസഭയില് ആര്എസ്എസിന്റെ ഗണഗീതം പാടിയതിന് കോണ്ഗ്രസ് ഹൈക്കമാന്റ് ശിവകുമാറിനെ ശാസിച്ചിരുന്നു. ഈ സാഹചര്യത്തില് അവരെ തൃപ്തിപ്പെടുത്താനാണ് ചാമുണ്ഡീദേവീക്ഷേത്രം ഹിന്ദുക്കളുടേത് മാത്രമല്ലെന്ന പ്രസ്താവന ശിവകുമാര് നടത്തിയത്. – ശോഭ കരാന്ത് ലജെ പറയുന്നു.
മതേതരത്വത്തെക്കുറിച്ച് പ്രസംഗിച്ചുനടക്കുന്നവര് ഒരു കാര്യം മനസ്സിലാക്കണം. ക്ഷേത്രങ്ങള് മതേതര ഇടമല്ല. അത് ഹിന്ദുസമുദായത്തില്പ്പെട്ടവര്ക്ക് മാത്രം അവകാശപ്പെട്ട പരിശുദ്ധമായ സ്ഥലമാണ്. – ശോഭ കരാന്ത്ലജെ പറയുന്നു.
മുസ്ലിം സമുദായത്തിലെ ഒരു എഴുത്തുകാരിയെക്കൊണ്ട് ദസറ ഉത്സവം ഉദ്ഘാടനം ചെയ്യിക്കുന്നതിനെ ബിജെപി എതിര്ക്കുകയാണ്. “ദസറ ഉത്സവം ഒരു മതേതര ഉത്സവമല്ല, അത് ഒരു ഹിന്ദു മത ഉത്സവമാണ്.ഭാനു മുഷ്താഖ് ചാമുണ്ഡേശ്വരി ദേവിയില് വിശ്വസിക്കുന്നുണ്ടോ? അവിടുത്തെ ആചാരങ്ങള് അവര് പാലിക്കുന്നുണ്ടോ”- ബിജെപി എംപി പ്രതാപ് സിംഹ ചോദിക്കുന്നു. “ഭാനു മുഷ്താഖ് ഹിന്ദു വിശ്വാസങ്ങളെ പിന്തുടരുന്ന ആളാണെങ്കില് വിരോധമില്ല. ഇവര് അങ്ങിനെയുള്ള ഒരാളല്ല. മാത്രമല്ല സിദ്ധരാമയ്യ ക്ഷണിച്ചത് ഭാനു മുഷ്കാഖിനെ മാത്രമാണ്. വാസ്തവത്തില് ഭാനു മുഷ്കാഖ് കന്നഡയില് എഴുതിയ ചെറുകഥകള് ഇംഗ്ലീഷിലേക്ക് തര്ജ്ജമ ചെയ്ത പുസ്തകത്തിനാണ് ബുക്കര് സമ്മാനം ലഭിച്ചത്. പക്ഷെ അത് വിവര്ത്തനം ചെയ്ത ദീപ ബഷ്ടിയെ സിദ്ധരാമയ്യ ക്ഷണിച്ചിട്ടുമില്ല. ഇത് രാഷ്ട്രീയമല്ലേ?”. – ബിജെപി കര്ണ്ണാടക സംസ്ഥാന പ്രസിഡന്റ് ബി.വൈ. വിജയേന്ദ്ര ചോദിക്കുന്നു.
