തിരുവനന്തപുരം: മാനഭംഗ കേസിലെ പ്രതി റാപ്പര് വേടനെ കുറിച്ചുള്ള കാര്യങ്ങള് സിലബസില് ഉള്പ്പെടുത്തിയ കേരള സര്വകലാശാല പാബ്ലോ നെരൂദ എഴുതാത്ത കവിത കുട്ടികളെ പഠിപ്പിച്ചും വിവാദത്തിലായി. സംഭവത്തില് ബോര്ഡ് ഓഫ് സ്റ്റഡീസ് ചെയര്മാന് വിശദീകരണം നല്കണമെന്ന് വിസി ആവശ്യപ്പെട്ടു. നാലാം വര്ഷ ബിഎ ഇംഗ്ലീഷ് ഒന്നാം സെമസ്റ്ററില് ചാറ്റ് ജിപിടി ടൂള് ഉപയോഗിച്ച് പാബ്ലോ നെരൂദയുടേതെന്ന പേരില് തയ്യാറാക്കിയ കവിത ചേര്ത്ത സംഭവത്തിലാണ് ബോര്ഡ് ഓഫ് സ്റ്റഡീസ് ചെയര്മാനോട് കേരള സര്വകലാശാലയിലെ വൈസ് ചാന്സലര് അടിയന്തര റിപ്പോര്ട്ട് തേടിയിരിക്കുന്നത്. ഇങ്ങനെയൊരു അബദ്ധം സംഭവിച്ചതു സംബന്ധിച്ച് വിശദീകരിക്കണമെന്നാണ് നിര്ദേശം.
‘ഇംഗ്ലീഷ്, യുആര്എ ലാംഗ്വേജ്’ എന്ന കവിത സിലബസില് ഉള്പ്പെടുത്തുകയും മാത്രമല്ല, പരീക്ഷയ്ക്ക് ഇതില് നിന്നുള്ള ചോദ്യങ്ങളും ഉണ്ടായിരുന്നു. എന്നാല് ഇതേക്കുറിച്ച് കൂടുതല് വിവരങ്ങള് തേടിയ ചില അധ്യാപകര് നെരൂദ ഇത്തരമൊരു കവിത എഴുതിയിട്ടില്ലെന്നു കണ്ടെത്തി. എഐ ജനറേറ്റഡ് ആണെന്ന് പിന്നീടാണ് വ്യക്തമായത്. സംഭവത്തില് അന്വേഷണം ആവശ്യപ്പെട്ട് വൈസ് ചാന്സിലര്ക്ക് പരാതി ലഭിച്ചതോടെയാണ് വിശദീകരണം തേടിയിരിക്കുന്നത്.
