കിളിമാനൂര്: മണ് പാത്ര നിര്മ്മാണ വ്യവസായവും, മണ് പാത്ര തൊഴിലാളികളും ധാരാളമായി ഉണ്ടായിരുന്ന ജില്ലയില് തൊഴിലില് ഏര്പ്പെട്ടിരുന്ന സമുദായം ഉണ്ടെങ്കിലും ഇപ്പോള് മണ് പാത്രം വേണമെങ്കില് തമിഴ് നാട്ടില് നിര്മ്മിക്കുന്ന പാത്രം വരേണ്ട സ്ഥിതി.
കിളിമാനൂര്, കൊടുവഴന്നൂര്, വെമ്പായം, അവനവഞ്ചേരി, പേട്ട, പേയാട്, നെയ്യാറ്റിന്കര, നേമം, നെടുമങ്ങാട് തുടങ്ങിയ പ്രദേശങ്ങളില് മണ് പാത്ര നിര്മ്മാണവുമായി ബന്ധപ്പെട്ട തൊഴിലില് ഏര്പ്പെട്ടിരുന്ന സമുദായത്തില് പെട്ടവര് തിങ്ങി പാര്ക്കുന്നുണ്ടെങ്കിലും കൊടുവഴന്നൂരും നെയ്യാറ്റിന്കര ഭാഗത്തുമാണ് മണ് പാത്ര നിര്മ്മാണം കുറച്ചെങ്കിലും ഇപ്പോള് നടക്കുന്നത്. നാമ മാത്രമായിട്ടാണ് കൊടുവഴന്നൂരില് നിര്മ്മാണം നടക്കുന്നത്.
പാത്ര നിര്മാണത്തിനാവശ്യമായ മണ്ണ് കിട്ടാനുള്ള ബുദ്ധിമുട്ട്, മണ്ണിന് വലിയ വില നല്കേണ്ട അവസ്ഥ, പാത്രം ചുട്ടെടുക്കുന്നതിനാവശ്യമായ വിറകിന്റെ ലഭ്യതക്കുറവ്, വിറകിന്റെ അമിത വില, പുതിയ തലമുറയ്ക്ക് കുലത്തൊഴിലിനോട് താല്പര്യമില്ലായ്മ, തൊഴിലാളികളെ കിട്ടാനില്ലാത്തതും അമിത കൂലിയും, മറ്റ് തൊഴിലുകള്ക്ക് പോയാല് ലഭിക്കുന്ന കൂലിയുമായി താരതമ്യം ചെയ്യുമ്പോഴുള്ള കൂലി കുറവ് ഇതൊക്കെ പാത്ര നിര്മ്മാണ വ്യവസായത്തെ പിന്നോട്ടടിക്കാന് കാരണമായി.
എന്നാല് തമിഴ്നാട്ടിലെ മണ്ടയ്ക്കാട്, തക്കല പ്രദേശങ്ങളില് മണ് പാത്രനിര്മ്മാണം വ്യാപകമായി നടക്കുന്നുണ്ട്. സഹകരണ സംഘം തന്നെ ഇതിനായി പ്രവര്ത്തിക്കുന്നുണ്ട്. കുടികളില് നിര്മ്മിക്കുന്ന പാത്രങ്ങളും ചെടിച്ചട്ടികളും സഹകരണ സംഘത്തില് ശേഖരിച്ച് ലോഡ് കണക്കിന് കയറ്റി അയയ്ക്കുന്നുണ്ട്. ആ മണ് പാത്രങ്ങളാണ് ജില്ലയില് വ്യാപകമായി എത്തുന്നത്. വാഹങ്ങളില് ഓരോ സ്ഥലത്തും എത്തിച്ച് തലച്ചുമടായി ആവശ്യക്കാരുടെ വീടുകളില് എത്തിച്ച് വില്ക്കുകയാണ് രീതി. ഇവര് തന്നെ കടകളിലും കൊടുക്കും. കടകളില് നിന്നും ലഭിക്കുന്നവയില് ഭൂരിഭാഗവും അന്യ നാടുകയില് നിന്നും വരുന്നവയാണ്.
ക്യാന്സര് പോലുള്ള മാരക അസുഖങ്ങള് വ്യാപകമായതോടെ മണ് പാത്രങ്ങള്ക്ക് ഇപ്പോള് ആവശ്യക്കാര് ഏറെയാണ്. ഓണം സീസണായതിനാല് തലചുമടുമായി പോകുന്ന തമിഴ് നാട്ടില് നിന്നുള്ള വ്യാപാരികള് നാട്ടിന്പുറങ്ങളില് സജീവമാണ്. വില കൂടുതലാണെങ്കിലും മെച്ചപ്പെട്ട പാത്രങ്ങളാണ് വില്പ്പനക്കെത്തുന്നത്.
ജന്മഭൂമി ഓണ്ലൈന്