തിരുവനന്തപുരം: കര്ഷകര് നേരിടുന്ന വിവിധ പ്രശ്നങ്ങള്ക്കു പരിഹാരം കാണണമെന്നാവശ്യപ്പെട്ട് കേരള സംയുക്ത കര്ഷകവേദിയുടെ ആഭിമുഖ്യത്തില് ഇന്ന് സെക്രട്ടേറിയറ്റിനു മുന്നില് ധര്ണ നടത്തും. എല്ലാ മേഖലകളിലുമുള്ള കര്ഷകരെയും പങ്കെടുപ്പിച്ചുള്ള ധര്ണ 10ന് ആരംഭിച്ച് രണ്ടിന്സമാപിക്കും.
നെല്സംഭരണത്തില് സംസ്ഥാനം കേന്ദ്രവുമായുള്ള കരാര് നടപ്പാക്കുക, കര്ഷകന് നെല്ലിന്റെ വില അവന്റെ അവകാശമാണ്, വില ലോണായി നല്കുന്ന പിആര്എസ് സമ്പ്രദായം അവസാനിപ്പിക്കുക, കൃഷിയെയും കര്ഷകരെയും കാട്ടുമൃഗ ശല്യത്തില് നിന്ന് രക്ഷിക്കുക, ഓണത്തിനു മുമ്പ് നെല്ക്കര്ഷക കുടിശിക മുഴുവന് കൊടുത്തു തീര്ക്കുക തുടങ്ങിയ ആവശ്യങ്ങളുന്നയിച്ചാണ് ധര്ണ.
വിവിധ ജില്ലകളില് നിന്നെത്തുന്ന കര്ഷകര് രക്തസാക്ഷി മണ്ഡപത്തില് സമ്മേളിച്ച് അവിടെ നിന്ന് പ്രകടനമായി സെക്രട്ടേറിയറ്റ് നടയിലെത്തിയാണ് ധര്ണയില് പങ്കെടുക്കുക. വിവിധ കാര്ഷികവൃത്തികളില് പുരസ്കാരം നേടിയവരും ആദരിക്കപ്പെട്ടവരുമടക്കം കര്ഷകരുടെ വന്നിര അണിചേരും.
