ലുധിയാന: ഇന്ത്യയ്ക്കെതിരെ 50 ശതമാനം വ്യാപാരത്തീരുവ ഏര്പ്പെടുത്തിയ അമേരിക്കയോടും ട്രംപിനോടും യുദ്ധം ചെയ്യാന് കാമ്പസില് കൊക്കകോളയും പെപ്സിയും ബഹിഷ്കാരിക്കാന് വിദ്യാര്ത്ഥികളോട് ആഹ്വാനം ചെയ്ത് ലവ്ലി പ്രൊഫഷണല് യൂണിവേഴ്സിറ്റിയിലെ ചാന്സലര് അശോക് കുമാര് മിത്തല്. രാജ്യസഭാ എംപി കൂടിയാണ് ലവ്ലി പ്രൊഫഷണല് യൂണിവേഴ്സിറ്റി സ്ഥാപകന് കൂടിയായ അശോക് കുമാര് മിത്തല്. ആം ആദ്മി പാര്ട്ടിയുടെ എംപിയാണ്.
രണ്ടാമത്തെ സ്വദേശി യുദ്ധത്തിന് സമയമായെന്നും അശോക് കുമാര് മിത്തല് പറഞ്ഞു. ഇന്ത്യയില് നിന്നും ഇറക്കുമതി ചെയ്യുന്ന ഉല്പന്നങ്ങള്ക്ക് 50 ശതമാനം തീരുവ ഏര്പ്പെടുത്തിയിരിക്കുകയാണ് ട്രംപ്. ഏതെങ്കിലും ഒരു രാജ്യത്തിന് മേല് ട്രംപ് ഏര്പ്പെടുത്തിയ ഏറ്റവും ഉയര്ന്ന തീരുവഭാരമാണ് ഇന്ത്യയ്ക്ക് മേല് ചാര്ത്തിയിരിക്കുന്നത്. “ഇത് യുഎസിന്റെ ഭീഷണിയാണെന്നും ഇതിന് മുന്നില് തലകുനിക്കരുത്”- അശോക് കുമാര് മിത്തല് പറയുന്നു. പഞ്ചാബ് ആസ്ഥാനമായി പ്രവര്ത്തിക്കുന്ന യൂണിവേഴ്സിറ്റിയാണ് ലവ്ലി പ്രൊഫഷണല് യൂണിവേഴ്സിറ്റി.
അമേരിക്കന് ശീതളപാനീയങ്ങള് കാമ്പസില് നിരോധിക്കുക വഴി ഒരു കാര്യം പ്രഖ്യാപിക്കുകയാണ്. അമേരിക്കയ്ക്ക് മുന്പില് ഇന്ത്യ തലകുനിക്കില്ല. – അശോക് കുമാര് മിത്തല് പറഞ്ഞു. “1905ല് വിദേശത്തുണികള് ബഹിഷ്കരിച്ച് ഇന്ത്യ നടത്തിയ സ്വദേശിപക്ഷോഭത്തിന്റെ രണ്ടാമത്തെ പതിപ്പാണ് ഇത്. അന്ന് ഇംഗ്ലണ്ടിന്റെ തുണികളും മറ്റ് ഉല്പന്നങ്ങളും ഇന്ത്യക്കാര് ബഹിഷ്കരിച്ചിരുന്നു. അതുപോലെയുള്ള ഒരു സമരമാണ് ഇപ്പോള് നടക്കേണ്ടത്. “- അശോക് മിത്തല് പറഞ്ഞു.
