ന്യൂദല്ഹി: കേസുകള് അനിശ്ചിതമായി നീളുന്നത് മാനസിക തടവിന് തുല്യമാണെന്ന് സുപ്രീംകോടതി. 22 വര്ഷം മുന്പ് 300 രൂപ കൈക്കൂലി ആവശ്യപ്പെട്ട കേസില് ശിക്ഷിക്കപ്പെട്ട വനിതാ സെന്ട്രല് എക്സൈസ് ഇന്സ്പെക്ടര് ഇതിനകം അനുഭവിച്ച കാലയളവ് തടവു ശിക്ഷയായി കണ്ടാണ് ജസ്റ്റിസ് എന് വി അഞ്ജാരിയ, ജസ്റ്റിസ് അതുല് എസ് ചന്തൂര്ക്കര് എന്നിവരുടെ ഈ നിരീക്ഷണം. സംഭവം നടന്നിട്ട് 22 വര്ഷം കഴിഞ്ഞുവെന്നും പ്രതിക്ക് ഇപ്പോള് 75 വയസുണ്ടെന്നും ബഞ്ച് ചൂണ്ടിക്കാട്ടി. 2002 സെപ്റ്റംബറില് ചാര്ജു ചെയ്ത കേസില് അഴിമതി നിരോധന നിയമപ്രകാരം വിചാരണ കോടതി കുറ്റക്കാരിയായി കണ്ടെത്തുകയും ഒരു വര്ഷം തടവിന് വിധിക്കുകയും ചെയ്തിരുന്നു. ഈ വിധി ശരിവച്ച ഹൈക്കോടതി വിധിക്കെതിരെയുള്ള അപ്പീലിലാണ് സുപ്രീം കോടതി ഈ നിലപാടെടുത്തത്.
