ഇടുക്കി : പട്ടയവ്യവസ്ഥ ലംഘിച്ചുള്ള ഭൂമി ഉപയോഗം ക്രമ വല്ക്കരിക്കുന്നതിനുള്ള ഭൂപതിവു ചട്ട ഭേദഗതി സംസ്ഥാന മന്ത്രിസഭായോഗം അംഗീകരിച്ചതിന് പിന്നില് അനധികൃതമായി നിര്മ്മിച്ച സിപിഎം പാര്ട്ടി ഓഫീസ് ക്രമപ്പെടുത്തിയെടുക്കാനുള്ള തിടുക്കം. ഇടുക്കി ശാന്തംപാറയില് ചട്ടം ലംഘിച്ച് സിപിഎം ഏരിയ കമ്മിറ്റിക്കായി ബഹുനില മന്ദിരം നിര്മ്മിച്ചത് വലിയ വിവാദമായിരുന്നു. അതിജീവന പോരാട്ടവേദി ഇതിനെതിരെ ഹൈക്കോടതിയെ സമീപിക്കുകയും നിര്മ്മാണം നിര്ത്തിവയ്ക്കാന് കോടതി ഉത്തരവിടുകയും ചെയ്തിരുന്നു. ഉത്തരവ് പിറ്റേന്ന് പത്രവാര്ത്തയാകുംമുന്പ് അന്ന് രാത്രി തന്നെ നിര്മ്മാണം നടത്തി. ഇത് ബോധ്യപ്പെട്ട കോടതി ഇനിയൊരു ഉത്തരവ് ഉണ്ടാകുംവരെ നിര്മ്മാണം പാടില്ലെന്ന് വിലക്കി. പിന്നീട് ഹൈക്കോടതി തന്നെ വ്യവസ്ഥകളോടെ നിര്മ്മാണ അനുമതി നല്കിതെങ്കിലും ഇനിയും പാര്ട്ടി ഓഫീസ് തുറക്കാന് കഴിഞ്ഞിട്ടില്ല. ഈ പശ്ചാത്തലത്തിലാണ് ഭൂപതിവു ചട്ട ഭേദഗതി മന്ത്രി സഭായോഗം അംഗീകരിക്കുന്നത്. പുതിയ ഭേദഗതിയുടെ മുഖ്യ ഗുണഭോക്താവ് പാര്ട്ടി തന്നെയെന്ന് ചുരുക്കം.
