തിരുവനന്തപുരം: സംസ്ഥാനത്ത് ബിജെപിയുടെ മുന്നേറ്റം തടയാന് പ്രതിപക്ഷനേതാവ് വി.ഡി. സതീശന്റെ ചീറ്റിയ ബോംബുകള്ക്കാകില്ലെന്ന് യുവമോര്ച്ച സംസ്ഥാന ജനറല് സെക്രട്ടറി ഗോകുല് ഗോപിനാഥ്. പ്രതിപക്ഷനേതാവ് വി.ഡി. സതീശന്റെ വസതിയിലേക്ക് യുവമോര്ച്ച സംഘടിപ്പിച്ച പ്രതിഷേധമാര്ച്ച് ഉദ്ഘാടനം ചെയ്യുകയായിരുന്നു അദ്ദേഹം.
കോണ്ഗ്രസ് നേതാക്കളുടെ ആലയങ്ങളില് അലഞ്ഞുനടക്കുന്ന രാഹുല്മാങ്കൂട്ടത്തിലെന്ന വിത്തുകാളയുടെ കുത്ത് കിട്ടിയതിന് വി.ഡി. സതീശന് ബിജെപിയുടെ മേക്കിട്ട് കേറിയിട്ട് കാര്യമില്ല. രാഹുല് മാങ്കൂട്ടത്തില് പാര്ട്ടിസ്ഥാനം രാജിവയ്ക്കുന്നതല്ല പ്രശ്നം.
ജനാധിപത്യപ്രക്രിയയുടെ ഭാഗമായി തെരഞ്ഞെടുക്കപ്പെട്ട എംഎല്എ സ്ഥാനത്തു തുടരാന് രാഹുല് മാങ്കൂട്ടത്തിലിന് യോഗ്യതയില്ല. യുവമോര്ച്ചയുടെ പ്രതിഷേധം ശക്തമായപ്പോള് കേരളത്തില് ബിജെപിയെ പിടിച്ചുകുലുക്കുന്ന ഒരു ബോംബ് തന്റെ പക്കലുണ്ടെന്നായിരുന്നു സതീശന് പറഞ്ഞത്. 48 മണിക്കൂര് നോക്കിയിരുന്നിട്ടും ഒരു ബോംബു കൊണ്ടുവരാന് സാധിച്ചില്ല.
വര്ഷങ്ങള്ക്കുമുമ്പ് നനഞ്ഞ് ചീറ്റിപ്പോയ പടക്കം മാത്രമാണ് പ്രതിപക്ഷനേതാവിന്റെ പക്കലുള്ളത്. സതീശന്റെ പക്കലുള്ള ബോംബുകള് കോണ്ഗ്രസ് നേതാക്കള്ക്ക് കൊടുക്കുന്നതാണ് ഉചിതമെന്നും ഗോകുല് ഗോപിനാഥ് പറഞ്ഞു. വി.ഡി.സതീശന്റെ ചിത്രം പതിച്ച നനഞ്ഞ് ചീറ്റിപ്പോയ പ്രതീകാത്മക നാടന് ബോംബുകളുമായിട്ടായിരുന്നു യുവമോര്ച്ചയുടെ പ്രതിഷേധം. പ്രതിഷേധ മാര്ച്ച് പ്രതിപക്ഷനേതാവിന്റെ വസതിക്കുമുന്നില് പോലീസ് ബാരിക്കേഡുയര്ത്തി തടഞ്ഞു.
സംസ്ഥാന സെക്രട്ടറി എ.എസ്. അഖില്, ട്രഷറര് ഋഷഭ് മോഹന്, നേതാക്കളായ വിഷ്ണു നേമം, സുരജ് കച്ചണി. വിഷ്ണു കൃഷ്ണപുരം, ശ്രീജീത്ത് നേമം എന്നിവര് മാര്ച്ചിന് നേതൃത്വം നല്കി.
