ന്യൂദല്ഹി: മെയ്ക്ക് ഇന് ഇന്ത്യ വഴി നിര്മ്മിച്ച രണ്ട് യുദ്ധക്കപ്പലുകള് നീറ്റിലിറക്കി ഇന്ത്യന് നാവിക സേന. ഐഎന്എസ് ഉദയഗിരി, ഐഎന്എസ് ഹിംഗിരി എന്നീ യുദ്ധക്കപ്പലുകളാണ് പുറത്തിറക്കിയത്. ഇന്ത്യയുടെ താല്പര്യങ്ങള് സംരക്ഷിക്കാനാവശ്യമായ സാമുദ്രിക ദൗത്യങ്ങള് നിര്വ്വഹിക്കാന് ഈ യുദ്ധക്കപ്പലുകള്ക്കാവും. അടുത്ത തലമുറ ആയുധങ്ങളും സംവിധാനങ്ങളും ആണ് ഈ കപ്പലുകളില് ഉള്ളത്. ഭൂതലത്തില് നിന്നും ഭൂതലത്തിലേക്ക് അയയ്ക്കാവുന്ന മിസൈലുകള്, ബ്രഹ്മോസ് മിസൈലുകള്, ടോര്പിഡോ ലോഞ്ചറുകള്, ആധുനിക ഫയര് കണ്ട്രോള് സംവിധാനം, ആക്രമണങ്ങളെ മാനേജ് ചെയ്യാനുള്ള സംവിധാനം എന്നിവ ഈ യുദ്ധക്കപ്പലുകളില് ഉണ്ട്. യുദ്ധക്കപ്പലിന് വേണ്ട പ്രധാന സെന്സറുകളും ആയുധങ്ങളും ഇന്ത്യയിലെ ഒറിജിനല് ഉപകരണ നിര്മ്മാതാക്കളില് നിന്നാണ് ശേഖരിച്ചത്. മറ്റ് ഭാഗങ്ങള് നിരവധി ചെറുകിട-ഇടത്തരം ഇന്ത്യന് കമ്പനികളില് നിന്നാണ് സ്വായത്തമാക്കിയത്. ഇന്ത്യയ്ക്കാവശ്യമായ യുദ്ധക്കപ്പലുകള് ഇന്ത്യയില് തന്നെ നിര്മ്മിക്കുക എന്നതായിരുന്നു ഇന്ത്യയുടെ ലക്ഷ്യം.
കേന്ദ്രപ്രതിരോധമന്ത്രി അധ്യക്ഷവഹിച്ച ചടങ്ങിലാണ് നാവികസേനയ്ക്ക് കരുത്തു പകരുന്ന രണ്ട് യുദ്ധക്കപ്പുകള് കമ്മീഷന് ചെയ്തത്. യുദ്ധക്കപ്പല് നിര്മ്മാണത്തില് ആത്മനിര്ഭരത കൈവരിക്കുക എന്ന ഇന്ത്യയുടെ നിശ്ചയദാര്ഢ്യത്തിന്റെ തിളക്കമാര്ന്ന ഉദാഹരണങ്ങളാണ് ഐഎന്എസ് ഉദയഗിരിയും ഐഎന്എസ് ഹിംഗിരിയും. ഇന്ത്യയിലെ രണ്ട് കപ്പല് നിര്മ്മാണ ശാലകള് ഒരേ സമയത്താണ് ഇവ പുറത്തിറക്കിയത്. രണ്ടുകപ്പലുകള് ഒരേ സമയം പുറത്തിറക്കുക എന്നത് അപൂര്വ്വമായ ചുവടുവെയ്പാണ്.
മുംബൈ ആസ്ഥാനമായ മസ്ഗോണ്ഡോക് കപ്പല് നിര്മ്മാണശാലയും കൊല്ക്കൊത്തയിലെ ഗാര്ഡന് റീച്ച് കപ്പ് നിര്മ്മാണശാലയും ആണ് ഈ യുദ്ധക്കപ്പലുകളുടെ നിര്മ്മാതാക്കള്. മസ്ഗോണ്ഡോക് കപ്പല് നിര്മ്മാണശാല നിര്മ്മിക്കുന്ന സ്റ്റെല്ത്ത് ഫ്രിഗേറ്റില് പെട്ട രണ്ടാമത്തെ യുദ്ധക്കപ്പലാണ് ഐഎന്എസ് ഉദയഗിരി. കൊല്ക്കൊത്തയിലെ ഗാര്ഡന് റീച്ച് കപ്പ് നിര്മ്മാണശാല നിര്മ്മിക്കുന്ന യുദ്ധക്കപ്പലുകളില് ആദ്യത്തേതാണ് ഐഎന്എസ് ഹിംഗിരി.
