തിരുവനന്തപുരം: ജനറല് ആശുപത്രിയില് നടന്ന ശസ്ത്രക്രിയയില് വന് പിഴവ്. കാട്ടാക്കട സ്വദേശി സുമയ്യ എന്ന ഇരുപത്തിയാറുകാരിയുടെ തൈറോയ്ഡ് ശസ്ത്രക്രിയക്കിടെ 50 സെന്റീമീറ്റര് നീളമുള്ള വയറാണ് കുടുങ്ങിയത്. യുവതി ആരോഗ്യ വകുപ്പില് പരാതി നല്കി.
ജനറല് ആശുപത്രിയിലെ ഡോ.രാജീവ് കുമാറിനെതിരെയാണ് യുവതിയുടെ പരാതി.2023 മാര്ച്ച് 22നാണ് ശസ്ത്രക്രിയ നടന്നത്.വീണ്ടും ആരോഗ്യ പ്രശ്നം ഉണ്ടായപ്പോള് ഇതേ ഡോക്ടറുടെ അടുത്ത് രണ്ടു വര്ഷം ചികിത്സ നടത്തി.അസുഖം കടുത്തപ്പോള് മറ്റൊരു ആശുപത്രിയില് ചികിത്സ തേടി.
അവിടെ എക്സ്റേ എടുത്തപ്പോഴാണ് നെഞ്ചിനുളളില് വയര് കണ്ടത്. തുടര്ന്ന് വീണ്ടും ഡോ.രാജീവ് കുമാറിനെ സമീപിച്ചപ്പോള് അദ്ദേഹം പിഴവ് സമ്മതിച്ചെന്നും യുവതി വ്യക്തമാക്കി.
ഡോ. രാജീവ് കുമാര് മറ്റു ഡോക്ടര്മാരുമായി സംസാരിച്ചു കീ ഹോള് വഴി വയര് എടുത്തു നല്കാമെന്നു അറിയിച്ചു. മറ്റാരോടും പറയരുതെന്നും ഡോക്ടര് ആവശ്യപ്പെട്ടെന്ന് യുവതി പറയുന്നു.
പിന്നീട് ഡോ.രാജീവ് കുമാറിന്റെ നിര്ദ്ദേശപ്രകാരം ശ്രീചിത്ര ആശുപത്രിയില് ചികിത്സ തേടി. സി.റ്റി സ്കാനില് വയര് രക്തകുഴലുമായി ഒട്ടി ചേര്ന്നെന്നും എടുക്കാന് കഴിയില്ലെന്നും വ്യക്തമായതോടെ ഡോ. രാജീവ് കുമാര് കയ്യൊഴിഞ്ഞെന്നും യുവതി പറഞ്ഞു.തുടര് ചികിത്സക്ക് മാര്ഗമില്ലെന്നും സുമയ്യ പറഞ്ഞു.
