കൊച്ചി: 1936ല്‍ മിടുക്കന്‍ തമ്പുരാന്‍ എന്നറിയപ്പെട്ടിരുന്ന കേരളവര്‍മ്മ തമ്പുരാന്‍ പെണ്‍കുട്ടികളുടെ കലാ അഭ്യാസത്തിനായി ഒരു വിദ്യാലയം ആരംഭിക്കുവാന്‍ തീരുമാനിക്കുകയുണ്ടായി. അദ്ദേഹത്തിന്റെ ഭാര്യയും പാലസ് സ്‌കൂള്‍ അദ്ധ്യാപികയുമായിരുന്ന ലക്ഷ്മിക്കുട്ടി വലിയ നേത്യാരമ്മയുടേയും മകള്‍ രാധയുടെയും പേരുകള്‍ ചേര്‍ത്ത് സുകുമാര കലകളുടെ അഭ്യാസത്തിനായുള്ള വിദ്യാലയത്തിന് രാധാലക്ഷ്മി വിലാസം ഫൈന്‍ ആര്‍ട്ട്‌സ് സ്‌കൂള്‍ എന്ന് പേരും നല്‍കി. അക്കാലത്ത് പഴയ തലമുറയിലെ സംഗീതജ്ഞരില്‍ പ്രമുഖനായിരുന്ന പറാട്ട് നാരായണമേനോന്‍ പള്ളിപ്പറമ്പ് കാവില്‍ സംഗീത കലാലയം എന്ന പേരില്‍ 40 കുട്ടികളെ സംഗീതം പഠിപ്പിച്ചിരുന്നു. ലക്ഷ്മിക്കുട്ടിയമ്മയുടെ ആവശ്യപ്രകാരം ഈ കുട്ടികളെ ആര്‍എല്‍വി സ്‌കൂളില്‍ ചേര്‍ത്ത് സംഗീത ക്ലാസ് ആരംഭിച്ചതോടെ അത് ആര്‍എല്‍വി സ്‌കൂള്‍ ആയും പിന്നീട് ആര്‍എല്‍വി അക്കാദമിയായും ഇപ്പോഴത്തെ ആര്‍എല്‍വി കോളജായും മാറിയത്.
തുടക്കത്തില്‍ നാരായണമേനോന്‍ ഭാഗവതര്‍ ആണ് വായ്‌പാട്ടും തിയറിയും പഠിച്ചിച്ചിരുന്നത്. ഹരികഥ – നാരായണ അയ്യര്‍, മൃദംഗം തബല – നാരായണ സ്വാമി, ഫ്‌ളൂട്ട് – കൃഷ്ണയ്യര്‍, നെയ്‌ത്ത് – ജാനകിയമ്മ, തുന്നല്‍ – പത്മിനി, ഡാന്‍സ് – കലാമണ്ഡലം മാധവമേനോന്‍, മദ്ദളം – ശിവരാമയ്യര്‍, ഷാഡോ ഗോപിനാഥന്‍ എന്നിവരായിരുന്നു ആദ്യകാല അദ്ധ്യാപകര്‍. ഹെഡ്മാസ്റ്റര്‍ അനന്തശങ്കരനാരായണനും. രാമവര്‍മ്മ അപ്പന്‍ തമ്പുരാന്‍ വിദ്യാഭ്യാസ ഡയറക്ടര്‍ ആയിരിക്കെ 1956 കലാലയം സര്‍ക്കാര്‍ ഏറ്റെടുത്തു. 1998 ല്‍ മഹാത്മാഗാന്ധി സര്‍വകലാശലയില്‍ അഫിലിയേറ്റ് ചെയ്തു.
പറാട്ട് നാരായണമേനോന്‍ ഭാഗവതര്‍ക്കും ഭാര്യ ജാനകിയമ്മയ്‌ക്കും ലക്ഷ്മിക്കുട്ടി നേത്യാരമ്മയോടും പുത്രി രാധയോടുമുള്ള ആദരവ് മൂലം തങ്ങളുടെ മകള്‍ക്ക് രാധാ ലക്ഷ്മി എന്ന പേരുമിട്ടു. പിതാവിന്റെ കീഴില്‍ സംഗീതം ആരംഭിച്ച രാധാലക്ഷ്മി ആര്‍എല്‍വി അക്കാദമിയിലെ ആദ്യ ബാച്ച് വിദ്യാര്‍ത്ഥിയായും എത്തി. ഭാരതത്തിലെ പ്രഗത്ഭ നാദസ്വരവിദ്വാനായ തിരുവിഴ ജയശങ്കര്‍ ആദ്യ ബാച്ചിലും ഗാനഗന്ധര്‍വ്വന്‍ യേശുദാസ് രണ്ടാം വര്‍ഷവും പഠനത്തിനായെത്തി. രാധാലക്ഷ്മി ടീച്ചറുടെ ആല്‍ബത്തില്‍ പതിറ്റാണ്ടുകള്‍ പിന്നിട്ടിട്ടും സൂക്ഷിക്കുന്ന ഈ ചിത്രം കലാലയത്തിന്റെ പ്രസക്തിയുടെ ചരിത്രം വിളംബരം ചെയ്യുന്നു. ഗാനഗന്ധര്‍വ്വന്‍ യേശുദാസ് അടങ്ങുന്ന ആ കലാലയ ഫോട്ടോ കേരളത്തിലെ തന്നെ സംഗീത ചരിത്രത്തിലെ അത്യപൂര്‍വ്വ പ്രതിഭകളുടെ യൗവന ചിത്രങ്ങള്‍ ആയി മാറിയിട്ടുണ്ട്.
എല്ലാം ചേര്‍ന്നത്. അന്നത്തെ സമര ദിനങ്ങളില്ലാത്ത ശാന്തമായ കലാലയ അന്തരീക്ഷം ആയിരുന്നു ടീച്ചറുടെ മനസ്സില്‍ ഇപ്പോഴും. പഠനം മാത്രമായിരുന്നു ലക്ഷ്യം. ഗുരുക്കന്‍മാരുടെ അനുഗ്രഹത്താല്‍ ഉള്ള ശിക്ഷണവും ഏറെ പ്രയോജനകരമായിരുനെന്നും ടീച്ചര്‍ ഓര്‍ക്കുന്നു. കൂടെ പഠിച്ചവരെ എല്ലാവരെയും ഓര്‍മിക്കുമ്പോഴും യേശുദാസ് പ്രശസ്തിയിലായതിനാല്‍ എന്നും ടിവിയിലും കാണാം എന്ന സന്തോഷമുണ്ട്. മൃദംഗം അദ്ധ്യാപകനായ മകന്‍ കൃഷ്ണകുമാര്‍ ആര്‍എല്‍വി കോളേജിലെ ഗസ്റ്റ് ലക്ചര്‍ ആണ്.
പ്രശസ്തിയുടെ കൊടുമുടിയിലേക്ക് താണ്ടണ്ടിയ നിരവധി പേര്‍ അക്കാലത്ത് പഠിച്ചിരുന്നു. ചേര്‍ത്തല ഗോവിന്ദന്‍കുട്ടി, ബാലസുബ്രഹ്‌മണ്യം, വൈക്കം വാസുദേവന്‍, നമ്പൂതിരി വൈക്കം സോമശേഖരന്‍ നായര്‍ തുടങ്ങിയവര്‍ ടീച്ചറുടെയും യേശുദാസിന്റെയും ബാച്ചിലുണ്ടായിരുന്നു. പ്രശസ്തരായ കല്യാണ സുന്ദരം, കുമാരസ്വാമി, നെച്ചൂര്‍ ഹരിഹര സുബ്രഹ്‌മണ്യ അയ്യര്‍, ബാലകൃഷ്ണന്‍, പന്തിയില്‍ പത്മം കൊച്ചമ്മണി നമ്പ്യാതിരി എന്നിവരായിരുന്നു ഗുരുക്കന്മാര്‍. പതിറ്റാണ്ടുകള്‍ക്ക് മുന്‍പുള്ള നിശബ്ദമായ കലാലയ പട്ടണത്തിന്റെ ഓര്‍മ്മകളാണ് ഇന്നും ടീച്ചറുടെ മനസ്സില്‍. കലാമണ്ഡലം കൃഷ്ണന്‍ നായര്‍, മാവേലിക്കര പ്രഭാകര വര്‍മ്മ, ബാലമുരളീകൃഷ്ണ, കാനായി കുഞ്ഞിരാമന്‍, സി.എന്‍. പൊറിഞ്ഞു കുട്ടി എന്നിവരും ഇവിടെ അദ്ധ്യാപകരായിരുന്നു.
ജന്മഭൂമി ഓണ്‍ലൈന്‍