ഗുവാഹത്തി: മാധ്യമപ്രവര്‍ത്തകരായ സിദ്ധാര്‍ത്ഥ് വരദരാജനും കരണ്‍ ഥാപ്പറിനും എതിരെ ആസാം പോലീസ് രജിസ്റ്റര്‍ ചെയ്ത കേസില്‍ അന്തരിച്ച മുന്‍ ജമ്മു കശ്മീര്‍ ഗവര്‍ണര്‍ സത്യപാല്‍ മാലിക്കിനേയും പാക് മാധ്യമപ്രവര്‍ത്തകന്‍ നജാം സേഥിയേയും പ്രതി ചേര്‍ത്തു. ഓപ്പറേഷന്‍ സിന്ദൂറിന് ശേഷം കരണ്‍ ഥാപ്പര്‍ ഇരുവരേയും ഇന്റര്‍വ്യൂ ചെയ്യുകയും ദി വയറിലൂടെ ഇത് പുറത്തുവിടുകയും ചെയ്തിരുന്നു. അഭിമുഖത്തിന്റെ ഉള്ളടക്കം രാജ്യവിരുദ്ധമാണെന്ന പരാതിയിലാണ് ഇരുവരേയും കൂടി പ്രതി ചേര്‍ത്തത്.
ഗുവാഹത്തി സ്വദേശിയായ ബിജു വെര്‍മ നല്‍കിയ പരാതിയില്‍ ബിഎന്‍എസ് സെക്ഷന്‍ 152 പ്രകാരമാണ് ആസാം പോലീസ് കേസ് രജിസ്റ്റര്‍ ചെയ്തിട്ടുള്ളത്. മെയ് 9ന് രജിസ്റ്റര്‍ ചെയ്ത കേസില്‍ ഭാരതത്തിന്റെ പരമാധികാരം, ഐക്യം, സുരക്ഷ എന്നിവയ്‌ക്കെതിരെ തെറ്റായതോ തെറ്റിദ്ധരിപ്പിക്കുന്നതോ ആയ വിവരങ്ങള്‍ പ്രസിദ്ധീകരിക്കല്‍, പൊതുജനങ്ങളെ കുഴപ്പത്തിലാക്കുന്ന പ്രസ്താവനകള്‍ നടത്തുക, ക്രിമിനല്‍ ഗൂഢാലോചന എന്നിവയാണ് പ്രതികള്‍ക്കെതിരെയുള്ള ആരോപണങ്ങള്‍. മാധ്യമ പ്രവര്‍ത്തകനായ അശുതോഷ് ഭരദ്വാജ് അടക്കം നിരവധി പേര്‍ കേസില്‍ പ്രതികളാണ്.
ഓപ്പറേഷന്‍ സിന്ദൂറുമായി ബന്ധപ്പെട്ട് രാജ്യ വിരുദ്ധ പരാമര്‍ശങ്ങള്‍ നടത്തിയതിനും, സൈന്യത്തിന്റെ വിശ്വാസ്യത തകര്‍ക്കുന്ന വാര്‍ത്തകള്‍ പ്രചരിപ്പിച്ചതിനും സിദ്ധാര്‍ത്ഥ് വരദരാജനോടും കരണ്‍ ഥാപ്പറോടും 22ന് ഹാജരാകാന്‍ പോലീസ് നോട്ടിസ് നല്‍കിയെങ്കിലും സുപ്രീംകോടതി അത്
സ്റ്റേ ചെയ്തു.
