ആലപ്പുഴ: മത്സ്യ കൃഷിക്ക് അനുയോജ്യമായ സാഹചര്യമാണ് കുട്ടനാട്ടിലുള്ളതെന്ന് കേരളത്തിന്റെ കാര്ഷിക പ്രതിസന്ധിയെക്കുറിച്ച് പഠിക്കാനെത്തിയ കേന്ദ്ര സംഘത്തിന് നേതൃത്വം നല്കുന്ന നാഷണല് ഫിഷറീസ് വികസന ബോര്ഡ് ചെയര്മാന് ഡോ. മുഹമ്മദ് കോയ. കുട്ടനാട് സന്ദര്ശിച്ച് കര്ഷകരുമായി സംവദിക്കുന്നതിനിടെ മങ്കൊമ്പ് എം.എസ്. സ്വാമിനാഥന് സ്മാരക നെല്ലു ഗവേഷണ കേന്ദ്രത്തില് നടന്ന കര്ഷകയോഗത്തില് പങ്കെടുത്തു സംസാരിക്കുകയായിരുന്നു ഡോ. മുഹമ്മദ് കോയ.
പൈലറ്റ് പ്രോജക്ട് കുട്ടനാട്ടില് നടപ്പിലാക്കുന്നതിനുള്ള സാധ്യതകള് ആരായും. ഒരു നെല്ലും ഒരു മീനും പദ്ധതിയുടെ അനുഭവ പാഠങ്ങള് പഠിച്ച് സംയോജിത മത്സ്യ കൃഷി പദ്ധതി നടപ്പിലാക്കാന് കഴിയുമെന്ന് അദ്ദേഹം ചൂണ്ടിക്കാട്ടി.
കേരളത്തിലെ തകര്ന്നടിഞ്ഞ കാര്ഷിക മേഖലയെ കുറിച്ച് പഠിച്ച് സമഗ്രമായ ഒരു റിപ്പോര്ട്ട് തയ്യാറാക്കി ഈ മാസം ആദ്യം കുമ്മനം രാജശേഖരന്റെ നേതൃത്വത്തില് സി. കൃഷ്ണകുമാര്, ഷാജി രാഘവന് എന്നിവരടങ്ങുന്ന സമിതി കേന്ദ്ര ഫിഷറീസ് വകുപ്പ് മന്ത്രി രാജീവ് രഞ്ജന് സിങ്, കേന്ദ്രകൃഷി മന്ത്രി ശിവരാജ് സിങ് ചൗഹാന് എന്നിവരെ അടക്കം അഞ്ചോളം മന്ത്രിമാരെ നേരിട്ട് കണ്ട് റിപ്പോര്ട്ട് സമര്പ്പിച്ചിരുന്നു.
അതിനോടൊപ്പം കേന്ദ്രമന്ത്രി ജോര്ജ് കുര്യന്റെയും കൃഷി വകുപ്പ് മന്ത്രിയുടെയും പ്രത്യേക താല്പര്യം പ്രകാരമാണ് ആദ്യ സംഘം കേരളത്തില് എത്തിയത്. കേന്ദ്ര കൃഷിമന്ത്രി ഉള്പ്പെടെയുള്ളവരും അടുത്ത ദിവസങ്ങളില് കേരളത്തിലെ കാര്ഷിക മേഖല സന്ദര്ശിക്കാന് എത്തും.
