ആലപ്പുഴ: സംസ്ഥാനത്തെ കാര്ഷിക മേഖലയിലെ രൂക്ഷമായ പ്രതിസന്ധികളെക്കുറിച്ച് പഠിക്കാന് കേന്ദ്ര സര്ക്കാര് നിയോഗിച്ച ആദ്യ വിദഗ്ധ സംഘം ഇന്നലെ കുട്ടനാട് സന്ദര്ശിച്ച് കര്ഷകരുമായി സംവദിച്ചു. കുട്ടനാട്ടിലെ കര്ഷകര് അഭിമുഖീകരിക്കുന്ന വിവിധ പ്രശ്നങ്ങള്ക്ക് പരിഹാരം കാണുന്നതിന്റെ ഭാഗമായി മത്സ്യക്കൃഷിയുടെ സാധ്യതകള് പഠിക്കുന്നതിന് കേന്ദ്ര ഫിഷറീസ് വിദഗ്ധ സംഘമാണ് കാര്ഷിക മേഖലകള് സന്ദര്ശിച്ചത്.
നാഷണല് ഫിഷറീസ് വികസന ബോര്ഡ് ചെയര്മാന് ഡോ. മുഹമ്മദ് കോയ, ഇന്ത്യന് കൗണ്സില് ഓഫ് അഗ്രികള്ച്ചറല് റിസര്ച്ചിന്റെയും കേന്ദ്ര മത്സ്യ ഗവേഷണ കേന്ദ്രത്തിന്റെയും പ്രിന്സിപ്പല് സയന്റിസ്റ്റ് ഡോ. ഇമല്ഡ ജോസഫ്, കേന്ദ്ര ബാക്ക് വാട്ടര് അക്വാകള്ച്ചര് ഇന്സ്റ്റിറ്റ്യൂട്ടിലെ ശാസ്ത്രജ്ഞന് ഡോ. കെ.പി. സന്ദീപ്, ഫിഷറീസ് വികസന ബോര്ഡിന്റെ എക്സിക്യൂട്ടിവ് അസിസ്റ്റന്റ് ആല്ബിന് ആല്ബര്ട്ട് എന്നിവരുടെ നേതൃത്വത്തിലുള്ള സംഘം പ്രദേശവാസികള്, കര്ഷകര്, കര്ഷകത്തൊഴിലാളികള് തുടങ്ങിയവരുമായി ആശയ വിനിമയം നടത്തി.
ആര് ബ്ലോക്ക് തുടങ്ങിയ കായല് പ്രദേശങ്ങള് സന്ദര്ശിച്ച് മത്സ്യക്കൃഷിക്കുള്ള സാധ്യതകള് ആരാഞ്ഞു. രാമങ്കരിയില് മത്സ്യക്കൃഷി നടത്തുന്ന തൊള്ളായിരം പാടശേഖരമാണ് ആദ്യം സന്ദര്ശിച്ചത്. ഒരു നെല്ലും ഒരു മീനും പദ്ധതിയനുസരിച്ച് കൃഷി ചെയ്യുന്ന പാടശേഖരങ്ങള് നേരില്ക്കണ്ട് കര്ഷകരോട് സംസാരിച്ചു.
മങ്കൊമ്പ് എം.എസ്. സ്വാമിനാഥന് സ്മാരക നെല്ലു ഗവേഷണ കേന്ദ്രത്തില് നടന്ന കര്ഷക യോഗത്തില് കേന്ദ്ര സംഘാംഗങ്ങള് പങ്കെടുത്തു.
സംയുക്ത കര്ഷകവേദി രക്ഷാധികാരി കുമ്മനം രാജശേഖരന്, ചെയര്മാന് കൃഷ്ണ പ്രസാദ്, വര്ക്കിങ് ചെയര്മാന് സി. കൃഷ്ണകുമാര്, വൈസ് ചെയര്മാന് ജോര്ജ് മാത്യു, ജനറല് കണ്വീനര് ഷാജി രാഘവന്, സെക്രട്ടറി ടി. അനിയപ്പന്, നെല്ക്കഷക സംരക്ഷണ സമിതി സെക്രട്ടറി സോണിച്ചന്, സ്വതന്ത്ര കര്ഷക സമിതി പ്രസിഡന്റ് ഗോപന് ചെന്നിത്തല, ബിഡിജെഎസ് സെക്രട്ടറി സന്തോഷ് ശാന്തി, ബിജെപി സൗത്ത് ജില്ലാ പ്രസിഡന്റ് സന്ദീപ് വാചസ്പതി, നോര്ത്ത് ജില്ലാ പ്രസിഡന്റ് അഡ്വ. പി.കെ. ബിനോയ്, പ്രഭാരി എന്. ഹരി, മണ്ഡലം പ്രസിഡന്റ് കെ.ജി. പ്രസാദ്, ജനറല് സെകട്ടറി അനില്കുമാര്, വൈസ് പ്രസിഡന്റ് ദിനേശ്, കര്ഷക മോര്ച്ച സെക്രട്ടറി രാമചന്ദ്രന് തുടങ്ങിയവരും ഒപ്പമുണ്ടായിരുന്നു. ജില്ലയിലെ വടക്കന് മേഖലയിലെ കൊച്ചുവാവക്കാട് പൊക്കാളി നെല്ക്കൃഷി പാടങ്ങള് സന്ദര്ശിച്ചാണ് സംഘം സന്ദര്ശനത്തിന് തുടക്കം കുറിച്ചത്.
