ന്യൂയോർക്ക്: ന്യൂയോർക്കിൽ വിനോദ സഞ്ചാരികളുമായി പോയ ബസ് നിയന്ത്രണം വിട്ട് മറിഞ്ഞ് അപകടം. അഞ്ച് പേർക്ക് ദാരുണാന്ത്യം. 50 വിനോദസഞ്ചാരികളാണ് ബസിലുണ്ടായിരുന്നത്. നയാഗ്ര വെള്ളച്ചാട്ടം കാണ്ട് തിരിച്ച് ന്യൂയോർക്ക് സിറ്റിയിലേക്ക് മടങ്ങുമ്പോഴാണ് അപകടമുണ്ടായത്.
ഇന്ത്യൻ, ചൈനീസ്, ഫിലിപ്പീൻസ് സ്വദേശികളായിരുന്നു ബസിൽ കൂടുതൽ ഉണ്ടായിരുന്നത്. പരിക്കേറ്റ് 30 ഓളം പേർ ആശുപത്രിയിലാണ്. നിയന്ത്രണം വിട്ട് ബസ് റോഡിന് ഒരു വശത്തേക്ക് മറിയുകയായിരുന്നു. നയാഗ്ര ഫോൾസിൽ നിന്നും 40 മൈൽ അകലെ പെംബ്രോക്ക് എന്ന പട്ടണത്തിനടുത്ത് വെച്ചായിരുന്നു.
ഡ്രൈവറുടെ ശ്രദ്ധ തെറ്റിയപ്പോൾ, നിയന്ത്രണം നഷ്ടപ്പെട്ട ബസ് ഡിവൈഡറിലിടിച്ച് റോഡരികിലെ താഴ്ചയിലേക്ക് മറിയുകയായിരുന്നെന്നാണ് പോലീസ് നിഗമനം. അപകടത്തിന് പിന്നാലെ യാത്രക്കാരിൽ പലരും ബസിന് പുറത്തേക്ക് തെറിച്ചുവീണിരുന്നു. മിക്കവരും സീറ്റ് ബെൽറ്റ് ധരിച്ചിരുന്നില്ലെന്നും പോലീസ് പറഞ്ഞു. ഡ്രൈവർ ജീവനോടെയുണ്ടെന്നും അപകടത്തിന്റെ വിശദാശങ്ങൾ അറിയാൻ ശ്രമിച്ചുകൊണ്ടിരിക്കുകയാണെന്നും പോലീസ് പറയുന്നു.
