തിരുവന്തപുരം: ക്രിമിനലുകളും അഴിമതിക്കാരും ജയിലഴി എണ്ണുമെന്നും അല്ലാതെ അവര് അധികാരക്കസേരയില് എത്തുകയല്ല ചെയ്യുകയെന്നും പ്രധാനമന്ത്രിയുടെ താക്കീത്. ഗൗരവമായ കുറ്റങ്ങള് ചെയ്തതിന്റെ പേരില് അറസ്റ്റിലാവുന്ന നേതാക്കളെ അധികാരത്തില് നിന്നും പുറത്താക്കാനുള്ള ബില്ലിന് തൃണമൂല് കോണ്ഗ്രസ് പിന്തുണ നല്കാത്ത സാഹചര്യത്തിലായിരുന്നു മോദിയുടെ ഈ മുന്നറിയിപ്പ്.
“പ്രധാനമന്ത്രിയോ മുഖ്യമന്ത്രിയോ ജയിലിലാകുന്ന സാഹചര്യത്തില് അവരെ സ്ഥാനത്ത് നിന്നും മാറ്റാന് ഇപ്പോള് നിയമ സാധുത ഇല്ല. ജയിലിലിരുന്ന് ഭരണം നടത്തുന്ന ഭരണാധികാരികള് എത്ര നാണം കെട്ടവരായിരിക്കും. അധ്യാപകരെ റിക്രൂട്ട് മെന്റ് ചെയ്ത അഴിമതിയുടെ പേരില് ഒരു തൃണമൂല് മന്ത്രി ഇപ്പോഴും ജയിലിലാണ്. ഇത്രയൊക്കെയായിട്ടും മന്ത്രി തന്റെ പദവി വിട്ടൊഴിയാന് തയ്യാറല്ല.” – ജയിലില് കഴിയുന്ന മന്ത്രി ചന്ദ്രനാഥ് സിന്ഹയെ പരോക്ഷമായി വിമര്ശിച്ച് മോദി പറഞ്ഞു.
“ക്രിമിനല് പശ്ചാത്തലമുള്ളവരെ തെരഞ്ഞെടുപ്പില് മത്സരിപ്പിക്കരുതെന്നും ഈ ബില്ലില് വ്യവസ്ഥയുണ്ട്. ആര്ക്കും ജയിലില് നിന്നും ഉത്തരവിടാന് സാധിക്കരുത്. പൊതുജനങ്ങളെ വെറും വോട്ട് ബാങ്കായി മാത്രം കാണരുത്. പകരം അവരുടെ വികസനം, അന്തസ്സ്, ആഗ്രഹങ്ങള് എന്നിവയും രാഷ്ട്രീയപാര്ട്ടികള് കണക്കിലെടുക്കണം.” – മോദി പറഞ്ഞു.
30 ദിവസം ജയിലില് കിടക്കുന്ന, കുറഞ്ഞത് അഞ്ച് വര്ഷത്തെ തടവ് ശിക്ഷ ലഭിക്കാവുന്ന കുറ്റം ചെയ്ത പ്രധാനമന്ത്രി, മുഖ്യമന്ത്രി, മന്ത്രിമാര് എന്നിവരെ അധികാരത്തില് നിന്നും നീക്കാന് അനുവദിക്കുന്ന ബില് പാര്ലമെന്റില് അവതരിപ്പിച്ച ശേഷമാണ് മോദി ബംഗാളില് റാലിയെ അഭിസംബോധന ചെയ്യാന് എത്തിയത്. ഈ ബില് പാര്ലമെന്റിന്റെ പരിഗണനയിലാണ്.
ബംഗാളിന്റെ വികസനത്തിന്റെ മുഖ്യശത്രുവാണ് മമതബാനര്ജിയുടെ സര്ക്കാരെന്നും മോദി കുറ്റപ്പെടുത്തി. ആര്ജി കാറിലെ വിദ്യാര്ത്ഥിയുടെ ബലാത്സംഗവും കൊലപാതകവും ഉയര്ത്തി മോദി തൃണമൂല് സര്ക്കാരിനെ വിമര്ശിച്ചു. കുറ്റകൃത്യവും അഴിമതിയും ബംഗാള് സര്ക്കാരിന്റെ മുഖമുദ്രയായിരിക്കുന്നു. സംസ്ഥാനത്ത് സ്ത്രീകള്ക്ക് നേരെയുള്ള ആക്രമണം വര്ധിക്കുകയാണ്. – മോദി പറഞ്ഞു.
ബംഗാളില് നടന്ന കൂറ്റന് ബഹുജന റാലിയെ അഭിസംബോധന ചെയ്ത് സംസാരിക്കുകയായിരുന്നു പ്രധാനമന്ത്രി മോദി. പരിവര്ത്തനം കൊണ്ടുവരാന് അടുത്ത വര്ഷം നടക്കുന്ന നിയമസഭാ തെരഞ്ഞെടുപ്പില് ബിജെപിയെ വിജയിപ്പിക്കാനും മോദി ജനങ്ങളോട് ആഹ്വാനം ചെയ്തു. നേരത്തെ ബീഹാറില് നടന്ന റാലിയിലും ആര്ജെഡിയ്ക്കെതിരെ മോദി ഇതേ വിമര്ശനങ്ങള് ഉയര്ത്തിയിരുന്നു.
