തിരുവനന്തപുരം: ഇക്കുറി മലയാളിയുടെ ഓണസദ്യയില് കുടുംബശ്രീയുടെ കൈപ്പുണ്യവും. രണ്ടിനം പായസം ഉള്പ്പെടെ ഇരുപതിലേറെ വിഭവങ്ങള് ഒരുക്കിയാണ് കുടുംബശ്രീ വനിതാ സംരംഭകര് ഓണാഘോഷം കെങ്കേമമാക്കുന്നത്. പതിനാല് ജില്ലകളിലും വിവിധ ബ്ലോക്കുകളിലും ഓണസദ്യ ബുക്ക് ചെയ്യുന്നതിന് കോള് സെന്റര് നമ്പര് ഉള്പ്പെടെയുള്ള ക്രമീകരണങ്ങള് പൂര്ത്തിയായി. പലയിടത്തും ബുക്കിങ്ങ് അതിവേഗം പുരോഗമിക്കുകയാണ്.
സര്ക്കാര് അര്ദ്ധസര്ക്കാര്, സ്വകാര്യ സ്ഥാപനങ്ങള്, ബാങ്കുകള്, സ്കൂളുകള്, മാധ്യമ സ്ഥാപനങ്ങള്, റെസിഡന്റ്സ് അസോസിയേഷനുകള് എന്നിവിടങ്ങളില് ഓണാഘോഷത്തിനാവശ്യമായ ഓണസദ്യ ലഭ്യമാക്കുന്നതിനാണ് ലക്ഷ്യമിടുന്നത്. വീടുകളില് നിന്നുള്ള ഓര്ഡറുകളും സ്വീകരിക്കും.
ആവശ്യക്കാര്ക്ക് ഇഷ്ടമുള്ള വിഭവങ്ങളും പായസവും തിരഞ്ഞെടുത്ത് മുന്കൂട്ടി ഓര്ഡര് നല്കാം. വാഴയില ഉള്പ്പെടെ ഇരുപതോളം വിഭവങ്ങളാണ് ഓണസദ്യയില് ഉണ്ടാവുക. വിഭവങ്ങളുടെ എണ്ണം അനുസരിച്ച് 150 രൂപ മുതല് 300 വരെയാണ് സദ്യയുടെ വില. ഓണസദ്യ ബുക്ക് ചെയ്തവര്ക്ക് അതത് കേന്ദ്രങ്ങളില് നിന്ന് നേരിട്ട് വാങ്ങാം. കൂടാതെ ഓണസദ്യ 25 എണ്ണത്തിനു മുകളില് ബുക്ക് ചെയ്യുന്നവര്ക്ക് ആവശ്യമെങ്കില് വിളമ്പി നല്കാനുള്ള സംവിധാനവും ഒരുക്കും. ഇതിന് പ്രത്യേകം തുക നല്കിയാല് മതിയാകും. കുടുംബശ്രീ കര്ഷക സംഘങ്ങള് ഉല്പാദിപ്പിക്കുന്ന ഗുണമേന്മയുള്ള പച്ചക്കറികളും പഴങ്ങളും കൂടാതെ സൂക്ഷ്മ സംരംഭകര് ഉല്പാദിപ്പിക്കുന്ന ഉല്പന്നങ്ങളും ഓണസദ്യ തയ്യാറാക്കാന് ഉപയോഗിക്കും.
