കൊച്ചി: ഫ്ളാറ്റ് നിര്മിച്ച് കൈമാറുന്നതില് നാല് വര്ഷത്തോളം കാലതാമസം വരുത്തുകയും അധിക തുക ഈടാക്കുകയും ചെയ്തെന്ന പരാതിയില് റിയല് എസ്റ്റേറ്റ് ഡെവലപ്പര് നഷ്ടപരിഹാരം നല്കണമെന്ന് എറണാകുളം ജില്ലാ ഉപഭോക്തൃ തര്ക്ക പരിഹാര കമ്മീഷന്. കാക്കനാട് സ്വദേശികളായ
സീനാ സൂസന് കുരുവിളയും മകന് മിഥുന് കുരുവിളയും നല്കിയ പരാതിയിലാണ് ഡി.ബി. ബിനു അധ്യക്ഷനും വി. രാമചന്ദ്രന്, ടി.എന് ശ്രീവിദ്യ എന്നിവര് അംഗങ്ങളുമായ ബെഞ്ചിന്റെ ഉത്തരവ്.
2010 മെയ് മാസം പരാതിക്കാര് 3429880 രൂപയ്ക്ക് കാക്കനാട്ട് അപ്പാര്ട്ട്മെന്റ് ബുക്ക് ചെയ്തത്. 2013 ജനുവരി 19-നകം ഫ്ളാറ്റ് കൈമാറുമെന്നായിരുന്നു കരാര്. എന്നാല്, 95% തുകയും അടച്ചിട്ടും അഞ്ച് വര്ഷത്തോളം താമസിച്ച് 2017 സെപ്റ്റംബറിലാണ് ഫ്ളാറ്റ് കൈമാറിയത്. ഇതിനിടയില് 10,22,063രൂപ സമ്മര്ദ്ദം കാരണം പരാതിക്കാര്ക്ക് അധികമായി നല്കേണ്ടിയും വന്നു. വിസ്തീര്ണ്ണം വര്ദ്ധിപ്പിച്ചു എന്ന പേരില് 2,74,480രൂപയും അധികമായി ഈടാക്കി. എന്നാല്, കൈമാറിക്കിട്ടിയ അപ്പാര്ട്ട്മെന്റ് നിലവാരം കുറഞ്ഞതായിരുന്നു. മതിയായ ജലവിതരണ സംവിധാനമോ, ശരിയായ ഇലക്ട്രിക്കല് ജോലികളും ചെയ്തിരുന്നില്ല. കരാര് പ്രകാരമുള്ള സമയത്ത് ഫ്ളാറ്റ് കൈമാറുന്നതില് നിര്മ്മാതാവ് പരാജയപ്പെടുന്നത് സേവനത്തിലെ ഗുരുതരമായ വീഴ്ചയാണെന്ന് സുപ്രീം കോടതിയുടെ വിധികള് ഉദ്ധരിച്ചുകൊണ്ട് കമ്മീഷന് നിരീക്ഷിച്ചു.
കാലതാമസം കാരണം പരാതിക്കാര്ക്ക് വാടകയിനത്തില് ചിലവായ 5,76,000 രൂപ തിരികെ നല്കണം. കൂടാതെ,പരാതിക്കാര്ക്ക് ഉണ്ടായ മാനസിക വിഷമത്തിനും ബുദ്ധിമുട്ടുകള്ക്കും കോടതി ചെലവിനും നഷ്ടപരിഹാരമായി 1,10,000 രൂപയും 45 ദിവസത്തിനകം നല്കണമെന്ന് കമ്മിഷന് ഉത്തരവായി. പരാതിക്കാര്ക്ക് വേണ്ടി അഡ്വക്കേറ്റ് ബിനു മാത്യു ഹാജരായി.
