തിരുവനന്തപുരം: വരും തലമുറയില് അച്ചടക്കബോധം വളര്ത്തുന്നതിനും ദേശസ്നേഹം ഊട്ടി ഉറപ്പിക്കുന്നതിനും യുവാക്കള്ക്ക് നിര്ബന്ധിത സൈനിക പരിശീലനം നല്കേണ്ടത് ആവശ്യമാണെന്ന് ഗവര്ണര് രാജേന്ദ്ര വിശ്വനാഥ് ആര്ലേക്കര്. പാങ്ങോട് മിലിട്ടറി സ്റ്റേഷനില് വിരമിച്ച സൈനികരെ ആദരിച്ച ചടങ്ങില് മുഖ്യാതിഥിയായി സംസാരിക്കുകയായിരുന്നു അദ്ദേഹം.
സായുധ സേന അവരുടെ അച്ചടക്കവും ത്യാഗവും കൊണ്ട് സമൂഹത്തിനാകമാനം മാതൃകയാണെന്ന് ഗവര്ണര് പറഞ്ഞു. ഉന്നത നിലവാരം പുലര്ത്തുന്ന നമ്മുടെ സേന മറ്റുള്ളവര്ക്ക് നിരന്തര പ്രചോദനമാണ്. അതിനാല് സേനാംഗങ്ങളെ ബഹുമാനിക്കേണ്ടത് രാജ്യത്തിന്റേയും സമൂഹത്തിന്റേയും ഉത്തരവാദിത്തമാണ്. മാതൃരാജ്യത്തെ മറ്റെന്തിനേക്കാളുപരി പരിഗണന നല്കി ബഹുമാനിക്കുകയും, രാജ്യത്തിനായി ജീവത്യാഗം ചെയ്യുന്നതിന് സദാ സന്നദ്ധമായിരിക്കുകയും ചെയ്യുന്ന നമ്മുടെ സൈനികര്ക്ക് ലഭിക്കുന്ന ആദരവ് സ്വാഭാവികമാണ്. നാം സമാധാനമായി ഉറങ്ങാന്വേണ്ടിയാണ് സായുധസേന ഉറക്കം ഉപേക്ഷിക്കാന് തീരുമാനിച്ചത് ഗവര്ണര് പറഞ്ഞു.
നമ്മുടെ സായുധ സേനയുടെ അച്ചടക്കം, പ്രചോദനം, നിസ്വാര്ത്ഥത എന്നീ ഗുണങ്ങള് നഷ്ടപ്പെടുത്താന് പാടില്ല. പകരം, അടുത്ത തലമുറയ്ക്കായി സംരക്ഷിക്കുകയും പകര്ന്നു നല്കുകയും ചെയ്യണമെന്ന് അദ്ദേഹം പറഞ്ഞു. ഈ വര്ഷത്തെ ആദരവിന്റെ പ്രമേയം ‘ശൗര്യ, ശക്തി, സമ്മാന്’ (ശൗര്യം, ശക്തി, ബഹുമാനം) എന്നതായിരുന്നു. സായുധ സേന അവശ്യഘട്ടങ്ങളില് ശരിയായ രീതിയില് വീര്യവും ശക്തിയും പ്രകടിപ്പിക്കുന്നുണ്ട്. അവര്ക്ക് അര്ഹമായ തരത്തില് ബഹുമാനം ലഭിക്കുന്നു എന്നത് തികച്ചും ഉചിതമാണെന്നും അദ്ദേഹം പറഞ്ഞു.
ചടങ്ങില് സ്റ്റേഷന് കമാന്ഡര് ബ്രിഗേഡിയര് അനുരാജ് ഉപാധ്യായ അധ്യക്ഷനായി.
