തിരുവനന്തപുരം: ‘സമ്പന്നര് കൂടുതല് സമ്പന്നരാവുകയും ദരിദ്രര് കൂടുതല് ദരിദ്രരാവുകയും ചെയ്യുന്ന സാമൂഹിക അവസ്ഥയാണ് മുതലാളിത്തം സൃഷ്ടിക്കുന്നത്’ സിപിഎം സംസ്ഥാന സെക്രട്ടറി എം.വി.ഗോവിന്ദന് പാര്ട്ടി പൊതുയോഗത്തില് അണികളോട് പറഞ്ഞ വാക്കുകളാണിത്. പാര്ട്ടി നേതാക്കളുടെ ഇന്നത്തെ രീതിയും അണികളുടെ ഇന്നത്തെ അവസ്ഥയും വ്യക്തമാക്കുന്നതാണ് ഗോവിന്ദന്റെ വാക്കുകള്. നേതാക്കളുടെ മക്കള്ക്കും കുടുംബത്തിനും ആഡംബര കാറുകള്, പഞ്ചനക്ഷത്ര ഹോട്ടലുകളില് താമസം, റിയല് എസ്റ്റേറ്റ് ബിസിനസുകള്, ബിനാമി വ്യാപാരങ്ങള്.
എന്നാല് പാര്ട്ടി പ്രവര്ത്തകര്ക്ക് മഴയും വെയിലുമേറ്റ് പണിയെടുത്തും മുദ്രാവാക്യം വിളിച്ചും നടക്കാനുള്ള അവസ്ഥ. സിപിഎം വിമതനായിരുന്ന പിരപ്പന്കോട് മുരളി ഇത് വളരെ വ്യക്തമായി പല പാര്ട്ടി യോഗങ്ങളിലും പറഞ്ഞിരുന്നു. അദ്ദേഹത്തിന് ലഭിച്ചത് സ്ഥാനം നല്കാതെ ഒതുക്കി മൂലയ്ക്ക് ഇരുത്തല്.
സിപിഎമ്മിന്റെ പ്രമുഖ നേതാക്കളും മന്ത്രിമാരും അവരുടെ കുടുംബാംഗങ്ങളുമെല്ലാം ഇന്ന് ലക്ഷാധിപതിമാരാണ്. പാര്ട്ടി സെക്രട്ടറി എം.വി. ഗോവിന്ദന്, മകന് ശ്യാംജിത്ത്, മുന് മന്ത്രി തോമസ് ഐസക്ക്, മന്ത്രി എം.ബി. രാജേഷ്, മുന് സ്പീക്കര് ശ്രീരാമകൃഷ്ണന് ഇവരെല്ലാം ഇന്ന് സംശയത്തിന്റെ നിഴലില്. സ്വര്ണക്കടത്തില് തുടങ്ങിയ വിവാദം ഇപ്പോള് കള്ളപ്പണം വെളുപ്പിക്കല് വരെ എത്തി നില്ക്കുന്നു. കള്ളപ്പണം വെളുപ്പിക്കാന് കണ്ടെത്തിയ പുതിയ മാര്ഗം തട്ടിക്കൂട്ട് കടലാസ് കമ്പനികള് രജിസ്റ്റര് ചെയ്ത് വിദേശികളെ വേഷം കെട്ടിച്ച് നിക്ഷേപകര് എന്ന വ്യാജേന കെട്ടിയിറക്കല്. എന്നാല് കീഴ് ഘടകങ്ങളിലെ പ്രവര്ത്തകരും കുടുംബങ്ങളും എന്തെങ്കിലും വ്യവസായം തുടങ്ങിയാലോ ഒരു വീട് വച്ചാലോ ആഡംബര വാഹനം വാങ്ങിയാലോ പാര്ട്ടിയോട് പറയണം അനുമതിയും വേണം. എന്നാല് മുഖ്യമന്ത്രിക്കും പാര്ട്ടി നേതാക്കള്ക്കും ഇത് ബാധകമല്ല.
നേതാക്കളും മക്കളും ആഡംബര ജീവിതം നയിക്കുന്നത് കണ്ടപ്പോള് സഹികെട്ട് തിരുവനന്തപുരത്ത് പാര്ട്ടി പ്രവര്ത്തകന് തുറന്നടിച്ചത് മുഖ്യമന്ത്രിയുടെ അടുക്കളയില് വരെ ഒരു മുതലാളിക്ക് സ്വാധീനം ഉണ്ടെന്ന്. മറുപടി നല്കാന് പാര്ട്ടി ഇതുവരെയും തയാറായില്ല. മുഖ്യമന്ത്രിയും ഇത് സംബന്ധിച്ച് പ്രതികരിച്ചില്ല. എന്നാല് ഒരു ക്വാറി മുതലാളിയില് നിന്ന് പണം വാങ്ങിയെന്ന ആരോപണത്തില് തിരുവനന്തപുരം ജില്ലയിലെ ഒരു പ്രവര്ത്തകന്റെ സ്ഥാനം തെറിക്കുകയും ചെയ്തു. മുന് സിഐടിയു നേതാവിന്റെ മകന് ഇന്ന് സ്ഥലത്തെ പ്രമാണിയാണ്.
പാര്ട്ടി പ്രവര്ത്തകര്ക്ക് പാര്ട്ടി ഓഫീസുകള് അന്യമായെന്ന് പറയുന്നു. മുതലാളിമാര്ക്ക് എപ്പോള് വേണമെങ്കിലും പാര്ട്ടി ഓഫീസില് എത്തി നേതാക്കളെ കാണാം. പാര്ട്ടി പ്രവര്ത്തകരുടെ ഇടയില് അടക്കം പറയുന്നത് പാര്ട്ടിയെ വളര്ത്താന് നേതാക്കളുടെ മക്കള് ആഡംബര ഹോട്ടലുകളില് കടകള് തുറന്ന് വച്ചിരിക്കുന്നുവെന്ന്.
