തിരുവനന്തപുരം: വോട്ടര് പട്ടികയുമായി ബന്ധപ്പെട്ട പ്രശ്നങ്ങള് സംബന്ധിച്ച് തൃശൂര് മുന് ജില്ലാ കളക്ടര് കൃഷ്ണ തേജയ്ക്ക് എതിരായ ആരോപണങ്ങളിലുള്പ്പെടെ വ്യക്തത വരുത്തി മുഖ്യ തെരഞ്ഞെടുപ്പ് ഓഫീസര് ഡോ. രത്തന്.യു.കേല്ക്കര്. ആരോപണങ്ങള് വസ്തുതാപരമായി ശരിയല്ലാത്തതും തെറ്റിദ്ധരിപ്പിക്കുന്നതുമാണ്. വോട്ടര് പട്ടികയുമായി ബന്ധപ്പെട്ട് എന്തെങ്കിലും ആശങ്കകളോ പരാതികളോ ഉണ്ടെങ്കില് തെരഞ്ഞെടുപ്പ് നിയമപ്രകാരം നിര്ദ്ദേശിച്ചിരിക്കുന്ന ഉചിതമായ നിയമ സംവിധാനങ്ങള് വഴി പരിഹരിക്കണമെന്നും മുഖ്യ തെരഞ്ഞെടുപ്പ് ഓഫീസര് വാര്ത്താകുറിപ്പില് അറിയിച്ചു. ഇതോടെ കള്ളവോട്ട് നടത്തിയെന്ന ഇടത് വലത് നേതാക്കളുടെ ആരോപണം പൊളിയുകയാണ്.
1950 ലെ ജനപ്രാതിനിധ്യ നിയമപ്രകാരം സ്ഥാപിതമായ തെരഞ്ഞെടുപ്പ് ചട്ടക്കൂട് അനുസരിച്ച്, സെക്ഷന് 13(ബി)(2) പ്രകാരം, ഇലക്ടറല് രജിസ്ട്രേഷന് ഓഫീസര്മാര് (ഇആര്ഒ) ആണ് ബൂത്ത് ലെവല് ഓഫീസര്മാരെ (ബിഎല്ഒ) നിയമിക്കുന്നത്. അസിസ്റ്റന്റ് ഇലക്ടറല് രജിസ്ട്രേഷന് ഓഫീസര്മാരുടെയും (എഇആര്ഒ) ഇആര്ഒമാരുടെയും നേരിട്ടുള്ള മേല്നോട്ടത്തിലാണ് ബിഎല്ഒമാര് പ്രവര്ത്തിക്കുന്നത്.
സ്വതന്ത്രവും ഘടനാപരവുമായ തെരഞ്ഞെടുപ്പ് സംവിധാനത്തിന്റെ ഭാഗമായി പ്രവര്ത്തിക്കുന്ന തെരഞ്ഞെടുപ്പ് ഉേദ്യാഗസ്ഥര്ക്കെതിരെ അടിസ്ഥാനരഹിതമായ ആരോപണങ്ങള് ഉന്നയിക്കുന്നതില് നിന്ന് എല്ലാവരും വിട്ടുനില്ക്കണം. യഥാര്ത്ഥ പരാതികള് പരിഹരിക്കുന്നതിന് ലഭ്യമായ നിയമപരമായ പരിഹാരങ്ങള് പ്രയോജനപ്പെടുത്തണമെന്നും മുഖ്യ തെരഞ്ഞെടുപ്പ് ഓഫീസര് അറിയിച്ചു.
വോട്ടര് പട്ടികയില് ക്രമക്കേട് നടത്താന് ബിഎല്ഒമാരും അസിസ്റ്റന്റ് ഇലക്ടറല് രജിസ്ട്രേഷന് ഓഫീസര്മാരും ജില്ലാ കളക്ടറുമടക്കം കൂട്ടുനിന്നുവെന്ന ആരോപണവുമായി ഇടത് വലത് മുന്നണികള് രംഗത്ത് എത്തിയിരുന്നു. ഇതടക്കം മുഖ്യതെരഞ്ഞെടുപ്പ് ഓഫീസര് തള്ളിക്കളഞ്ഞിട്ടുണ്ട്.
