മലപ്പുറം: ഓണ്ലൈന് ഗെയിമിന്റെ ലഹരിയില് പെട്ട യുവാവ് ജീവനൊടുക്കി.
പാത്തുകല് മുതുകുളം ഈട്ടിക്കല് ടോണി കെ. തോമസ്(27) ആണ് മരിച്ചത്. അച്ഛന്റെ മരണത്തോടെയാണ് ടോണി ഓണ്ലൈന് ഗെയിം ചൂതാട്ടത്തിലേക്ക് തിരിഞ്ഞത്.
ഒന്നോ രണ്ടോ തവണ 1600 രൂപ വീതം ലഭിച്ചതായി ബന്ധുക്കള് പറയുന്നു.പിതാവ് കുഞ്ഞുമോന് തോമസ് ജോലി ചെയ്തിരുന്ന പത്തനാപുരം മൗണ്ട് താബോര് സ്കൂളില് ടോണിക്ക് ഒന്നര വര്ഷം മുമ്പാണ് പ്യൂണായി നിയമനം ലഭിച്ചത്.ജോലി ലഭിച്ചിട്ടും ഓണ്ലൈന് ഗെയിം ഹരമായി കൊണ്ടുനടന്നു. അധ്യാപകരില് നിന്നും സഹപ്രവര്ത്തകരില് നിന്നും ബന്ധുക്കളില് നിന്നുമൊക്കെ പണം കടം വാങ്ങി ഓണ്ലൈന് ഗെയിമില് മുടക്കി. ശമ്പളം വാങ്ങി കടം തിരിച്ചു കൊടുത്തു. പിന്നെയും കടം വാങ്ങി ഓണ്ലൈന് ഗെയിം ചൂതാട്ടം നടത്തും.
പതിവായി രാവിലെ ടോണിയാണ് സ്കൂള് തുറന്നിരുന്നത്. എന്നാല് തിങ്കളാഴ്ച പതിവ് സമയം കഴിഞ്ഞിട്ടും സ്കൂളിന്റെ പ്രധാന കവാടം അടഞ്ഞു കിടന്നതിനാല് മറ്റു ജീവനക്കാര് ടോണിയെ ഫോണ് വിളിച്ചെങ്കിലും ലഭ്യമായില്ല. തുടര്ന്ന് സഹപ്രവര്ത്തകര് ടോണി താമസിക്കുന്ന ടൗണിലെ ഫ്ലാറ്റില് എത്തിയപ്പോഴാണ് മരിച്ച നിലയില് കണ്ടെത്തിയത്. ആറ് മാസം മുന്പ് വീട്ടുകാര് ഇടപ്പെട്ട് ടോണിയെ കൗണ്സിലിംഗിന് വിധേയമാക്കിയെങ്കിലും വീണ്ടും ഓണ്ലൈന് ഗെയിമിലേക്കെത്തി.
കഴിഞ്ഞ രാത്രിയില് ടോണി താമസിക്കുന്ന ഫ്ലാറ്റിന്റെ ഉടമ ഷാനവാസില് നിന്ന് 2000 രൂപ കടംവാങ്ങിയിരുന്നു. ടോണിയുടെ മുറിയില് നിന്നും ആത്മഹത്യ കുറിപ്പും കണ്ടെടുത്തു.
