തൃശൂർ: ഇരട്ട വോട്ടിൽ കോൺഗ്രസ് നേതാവ് ടി.എൻ പ്രതാപന്റെ ജ്യേഷ്ഠന്റെ മകൾ സഞ്ജു ഹരിദാസിനെതിരെ പരാതി നൽകി ബിജെപി. തളിക്കുളം പഞ്ചായത്ത് കമ്മിറ്റിയാണ് പരാതി നൽകിയത്. തളിക്കുളം പഞ്ചായത്തിൽ ബ്ലോക്ക് ഡിവിഷനിലേക്ക് മത്സരിച്ച കോൺഗ്രസ് നേതാവായിരുന്നു സഞ്ജു ഹരിദാസ്.
സഞ്ജു ഹരിദാസിനെ തളിക്കുളം പഞ്ചായത്തിലെ പത്താം വാർഡിൽ ക്രമ നമ്പർ 625ലും പതിമൂന്നാം വാർഡിൽ ക്രമ നമ്പർ 424ലുമാണ് വോട്ടുള്ളത്. നടക്കാൻ പോകുന്ന ത്രിതല പഞ്ചായത്ത് തെരഞ്ഞെടുപ്പിൽ ഈ രണ്ട് വാർഡുകളിലും സഞ്ജു ഹരിദാസിന് വോട്ടുണ്ട്. ഇവരുടെ ഭർത്താവിനും ഇതേപോലെ രണ്ട് സ്ഥലങ്ങളിൽ വോട്ടുണ്ട്. ടി. എൻ പ്രതാപൻ സുരേഷ് ഗോപിക്കെതിരെ വോട്ട് ക്രമക്കേട് കാണിച്ചുവെന്ന് ആരോപിച്ച് ജില്ലാ പോലീസ് മേധാവിക്കടക്കം പരാതി നൽകിയിരുന്നു. ഇതിനിടെയാണ് ടി. എൻ പ്രതാപന്റെ കുടുംബാംഗങ്ങളുടെ ഇരട്ട വോട്ടുകൾ പുറത്തു വന്നിട്ടുള്ളത്.
തൃശൂരിൽ ഇരട്ട വോട്ടുകൾ ചേർക്കുന്നതിൽ ടി. എൻ പ്രതാപന് മുഖ്യപങ്കാണുള്ളതെന്ന് ബിജെപി ആരോപിച്ചിരുന്നു. ഈ ആരോപണത്തിന് തൊട്ടുപിന്നാലെയാണ് ഇരട്ട വോട്ട് വിഷയത്തിൽ അടിയന്തിര നടപടി ആവശ്യപ്പെട്ടുകൊണ്ട് ബിജെപി പോലിസിൽ പരാതി നൽകിയത്. ഈ വിഷയത്തിൽ കോടതിയെ സമീപിക്കുമെന്നും തളിക്കുളം ബിജെപി പഞ്ചായത്ത് കമ്മിറ്റി വ്യക്തമാക്കിയിട്ടുണ്ട്.
