ന്യൂദൽഹി: കരട് വോട്ടർ പട്ടിക അന്തിമമാക്കുന്നതിനുള്ള തിരുത്തൽ പ്രവർത്തനം നടക്കുമ്പോൾ വോട്ടുമോഷണം എന്ന ആരോപണം ഉന്നയിച്ചത് ഭരണഘടനാ വിരുദ്ധമായ പ്രവർത്തനമായെന്ന് തെരഞ്ഞെടുപ്പുകമ്മീഷൻ. കമ്മീഷന്റെ മൂന്നംഗങ്ങളും സംയുക്തമായി നടത്തിയ വാർത്താ സമ്മേളനത്തിൽ പ്രതിപക്ഷ നേതാവ് രാഹുൽ ഗാന്ധി ഉൾപ്പെടെ ഉയർത്തിയ ആരോപണങ്ങൾക്ക് മറുപടി പറയുകയായിരുന്നു മുഖ്യ തെരഞ്ഞെടുപ്പ് കമ്മീഷണർ ജ്ഞാനേഷ് കുമാർ.
കമ്മീഷന്റെ വിശദീകരണത്തിൽനിന്ന്:
- ബീഹാറിലെ വിവാദമായ സ്പെഷൽ ഇന്റൻസീവ് റിവിഷൻ (എസ്ഐആർ) ന് ശേഷമുള്ള ആദ്യ പത്രസമ്മേളനമായിരുന്നു. കമ്മീഷന് ഭരണപക്ഷമോ പ്രതിപക്ഷമോ ഇല്ല.
- ഭാരത ഭരണഘടന അനുസരിച്ച്, 18 വയസ്സ് തികഞ്ഞ ഭാരതീയർ എല്ലാം വോട്ടർ ആകണം, വോട്ട് ചെയ്യണം.
- നിയമമനുസരിച്ച്, എല്ലാ രാഷ്ട്രീയ പാർട്ടികളും തെരഞ്ഞെടുപ്പ് കമ്മീഷനിൽ രജിസ്ടർ ചെയ്യണം. അപ്പോഴാണ് അംഗീകരിക്കപ്പെടുകയെന്ന് നിങ്ങൾക്കെല്ലാവർക്കും അറിയാം. ഒരേ രാഷ്ട്രീയ പാർട്ടികൾക്കിടയിൽ തെരഞ്ഞെടുപ്പ് കമ്മീഷന് എങ്ങനെ വിവേചനം കാണിക്കാൻ കഴിയും? കമ്മീഷനെ സംബന്ധിച്ചിടത്തോളം എല്ലാവരും തുല്യരാണ്. ഏത് രാഷ്ട്രീയ പാർട്ടിയിൽ പെട്ടവരായാലും, കമ്മീഷൻ അതിന്റെ ഭരണഘടനാപരമായ കടമയിൽ നിന്ന് പിന്മാറുകയില്ല.
- എസ്ഐആർ നടപടികൾക്ക് ഇത്ര തിടുക്കമെന്തുകൊണ്ടാണെന്ന് ചോദിച്ച് ചിലർ തെറ്റിദ്ധരിപ്പിക്കുന്നു? വോട്ടർ പട്ടിക തെരഞ്ഞെടുപ്പിന് മുമ്പോ ശേഷമോ തിരുത്തണോ? കമ്മീഷൻ ഇക്കാര്യത്തിൽ അഭിപ്രായം പറയുന്നില്ല; ജനപ്രാതിനിധ്യ നിയമം പറയുന്നത് ഓരോ തെരഞ്ഞെടുപ്പിനു മുമ്പും വോട്ടർ പട്ടിക തിരുത്തണമെന്നാണ്.
- ഇത് കമ്മീഷന്റെ നിയമപരമായ ഉത്തരവാദിത്വമാണ്. അപ്പോൾ കമ്മീഷന് ബീഹാറിലെ ഏഴ് കോടിയിലധികം വോട്ടർമാരെ വോട്ടെടുപ്പിന് മുമ്പ് സമ്പർക്കം ചെയ്യാൻ കഴിയുമോ എന്ന ചോദ്യം ഉയർന്നു. ജൂൺ 24 ന് ജോലി ആരംഭിച്ചു എന്നതാണ് സത്യം. ജൂലൈ 20-ഓടെ മുഴുവൻ പ്രക്രിയയും പൂർത്തിയായി.’
- തെരഞ്ഞെടുപ്പ് പ്രവർത്തനങ്ങളിൽ ഏർപ്പെട്ടിരിക്കുന്നത് ഒരു കോടിയിലധികം ജീവനക്കാരാണ്. അവർക്ക് അത്തരമൊരു സുതാര്യമായ പ്രക്രിയയിൽ ‘വോട്ട് മോഷണം’ സംഭവിക്കുമോ?
- ലോക്സഭാ തെരഞ്ഞെടുപ്പ് പ്രക്രിയയിൽ, ഒരു കോടിയിലധികം ജീവനക്കാർ, 10 ലക്ഷത്തിലധികം ബൂത്ത് ലെവൽ ഏജന്റുമാർ, സ്ഥാനാർത്ഥികളുടെ 20 ലക്ഷത്തിലധികം പോളിംഗ് ഏജന്റുമാർ എന്നിവർ തെരഞ്ഞെടുപ്പിനായി പ്രവർത്തിക്കുന്നു. ഇത്രയധികം ആളുകളുടെ മുന്നിൽ ഇത്രയും സുതാര്യമായ ഒരു പ്രക്രിയയിൽ, ഏതെങ്കിലും വോട്ടർക്ക് വോട്ട് മോഷ്ടിക്കാൻ കഴിയുമോ?
- പശ്ചിമ ബംഗാളിൽ എസ്ഐആർ നടത്തുന്നതിനെക്കുറിച്ച്, ബംഗാളിലോ മറ്റ് സംസ്ഥാനങ്ങളിലോ എപ്പോൾ നടപടിക്രമങ്ങൾ നടത്തണമെന്ന് മൂന്ന് തെരഞ്ഞെടുപ്പ് കമ്മീഷണർമാർ തീരുമാനിക്കും.
- ഇപ്പോഴും രണ്ട് ഘട്ടങ്ങളായുള്ള അപ്പീൽ തുടരാം – തുടക്കത്തിൽ ജില്ലാ മജിസ്ട്രേറ്റിനും (ഡിഎം) അതിനുശേഷം ചീഫ് ഇലക്ടറൽ ഓഫീസർക്കും (സിഇഒ) മുമ്പാകെ ഇത് ചെയ്യാം.
- ചില രാഷ്ട്രീയ പാർട്ടികളും അവരുടെ ബൂത്ത് ലെവൽ ഏജന്റുമാരും ഉചിതമായ സമയത്ത് (ക്ലെയിമുകളിലും എതിർപ്പുകളിലും അപ്പീൽ കാലയളവിലും) വോട്ടർ പട്ടിക പരിശോധിച്ചിട്ടില്ല. പിശകുകൾ ഉണ്ടെങ്കിൽ, എസ്ഡിഎമ്മുകൾ/ഇആർഒകൾ, ഡിഇഒകൾ അല്ലെങ്കിൽ സിഇഒമാർ എന്നിവരെ ചൂണ്ടിക്കാണിച്ചിട്ടില്ല.
- ശരിയായ സമയത്ത് ശരിയായ വഴികളിലൂടെ ഇത് ചെയ്തിരുന്നെങ്കിൽ, എസ്ഡിഎം/ഇആർഒയ്ക്ക് തെറ്റുകൾ തിരുത്താൻ കഴിയുമായിരുന്നു.
- വോട്ടർ പട്ടിക തയ്യാറാക്കുന്നതിനും അന്തിമമാക്കുന്നതിനും അവയുടെ കൃത്യത ഉറപ്പാക്കുന്നതിനും ബൂത്ത് ലെവൽ ഓഫീസർമാരുടെ (ബിഎൽഒ) സഹായത്തോടെ സബ്-ഡിവിഷണൽ മജിസ്ട്രേറ്റുകൾ ഇലക്ടറൽ രജിസ്ട്രേഷൻ ഓഫീസർമാരായി (ഇആർഒ) പ്രവർത്തിക്കുന്നു. കരട് പട്ടിക പ്രസിദ്ധീകരിച്ചുകഴിഞ്ഞാൽ, ഡിജിറ്റൽ, ഭൗതിക പകർപ്പുകൾ രാഷ്ട്രീയ പാർട്ടികളുമായി പങ്കിടുകയും ഇസിഐ വെബ്സൈറ്റിൽ അപ്ലോഡ് ചെയ്യുകയും ചെയ്യുന്നു. ഈ ഘട്ടത്തിലൊന്നും ഉയർത്താത്ത ആക്ഷേപങ്ങളും ആരോപണങ്ങളുമാണ് ഇപ്പോൾ പ്രചരിപ്പിക്കുന്നത്.
- ബീഹാറിലെ പ്രക്രിയയിൽ, മുഴുവൻ വോട്ടർമാരും, പാർട്ടികൾ നാമനിർദ്ദേശം ചെയ്ത 1.6 ലക്ഷം ബൂത്ത് ലെവൽ ഏജന്റുമാരും ചേർന്ന് ഒരു കരട് പട്ടിക തയ്യാറാക്കിയിട്ടുണ്ട്.
- സാധാരണയായി, എല്ലാ വോട്ടർമാരും, രാഷ്ട്രീയ പാർട്ടികളും, ബിഎൽഒകളും സുതാര്യമായ രീതിയിൽ ഒരുമിച്ച് പ്രവർത്തിക്കുന്നു. അവർ നടപടികൾ സാക്ഷ്യപ്പെടുത്തുക മാത്രമല്ല, ഒപ്പിടുകയും വീഡിയോ സാക്ഷ്യപത്രങ്ങൾ നൽകുകയും ചെയ്യുന്നു. ജില്ലാതല പാർട്ടി പ്രസിഡന്റുമാരുടെയും അവരുടെ നാമനിർദ്ദേശം ചെയ്ത ബിഎൽഎകളുടെയും ഈ സാക്ഷ്യപ്പെടുത്തിയ രേഖകൾ അവരവരുടെ സംസ്ഥാന- ദേശീയ തല നേതാക്കളിലേക്ക് എത്തുന്നില്ല, അല്ലെങ്കിൽ മനപ്പൂർവ്വം ആശയക്കുഴപ്പം പരത്താൻ അടിസ്ഥാന യാഥാർത്ഥ്യം അവഗണിക്കപ്പെടുന്നു എന്നത് ഗുരുതരമായ ആശങ്കാജനകമാണ്.
- ഏഴ് കോടിയിലധികം വോട്ടർമാർ തെരഞ്ഞെടുപ്പ് കമ്മീഷന്റെ കൂടെ നിൽക്കുമ്പോൾ, തെരഞ്ഞെടുപ്പ് കമ്മീഷന്റെയോ വോട്ടർമാരുടെയോ വിശ്വാസ്യതയെ ചോദ്യം ചെയ്യാൻ കഴിയില്ല.
- ഏതാനും ദിവസം മുമ്പ് നിരവധി വോട്ടർമാരുടെ ഫോട്ടോകൾ അവരുടെ അനുമതിയില്ലാതെ മാധ്യമങ്ങൾക്ക് മുന്നിൽ പ്രദർശിപ്പിച്ചു കണ്ടു. അവർക്കെതിരെ ആരോപണങ്ങൾ ഉന്നയിക്കുകയും ചെയ്തു. അത് നിയമവിരുദധമാണ്.
- വോട്ടർ പട്ടികയിൽ പേരുള്ളവർ മാത്രമേ സ്ഥാനാർത്ഥിയെ തെരഞ്ഞെടുക്കാൻ വോട്ട് ചെയ്തുള്ളൂ.
- ചില വോട്ടർമാർ ഇരട്ട വോട്ട് ആരോപിച്ചു. തെളിവ് ചോദിച്ചപ്പോൾ ഉത്തരം ലഭിച്ചില്ല. തെരഞ്ഞെടുപ്പ് കമ്മീഷനോ ഒരു വോട്ടറോ അത്തരം വ്യാജ ആരോപണങ്ങളെ ഭയപ്പെടുന്നില്ല. ഭാരതത്തിലെ വോട്ടർമാരെ ലക്ഷ്യം വച്ച് കമ്മീഷന്റെ തോളിൽ ആരോപണത്തിന്റെ രാഷ്ട്രീയ തോക്കുമായി’ കളിക്കുമ്പോൾ, കമ്മീഷൻ വ്യക്തമാക്കാൻ ആഗ്രഹിക്കുന്നു, കമ്മീഷൻ ഭയപ്പെടാതെ പാറപോലെ ഉറച്ചുനിന്നു. ദരിദ്രർ, ധനികർ, വൃദ്ധർ, സ്ത്രീകൾ, യുവാക്കൾ എന്നിവരുൾപ്പെടെ എല്ലാ വിഭാഗങ്ങളിലെയും എല്ലാ മതങ്ങളിലെയും എല്ലാ വോട്ടർമാരും ഒരു വിവേചനവുമില്ലാതെ നിലകൊള്ളുന്നു, തുടർന്നും നിലകൊള്ളും.
- റിട്ടേണിംഗ് ഓഫീസർ ഫലങ്ങൾ പ്രഖ്യാപിച്ചതിനുശേഷവും, 45 ദിവസത്തിനുള്ളിൽ, രാഷ്ട്രീയ പാർട്ടികൾക്ക് സുപ്രീം കോടതിയിൽ പോയി തെരഞ്ഞെടുപ്പുഫലത്തെ ചോദ്യം ചെയ്യാം. തെരഞ്ഞെടുപ്പ് ഹർജി ഫയൽ ചെയ്യാൻ കഴിയുമെന്നാണ് നിയമത്തിലെ വ്യവസ്ഥ. ഈ 45 ദിവസത്തിനുശേഷം, കേരളത്തിലായാലും കർണാടകയിലായാലും ബീഹാറിലായാലും, അടിസ്ഥാനരഹിതമായ ആരോപണങ്ങൾ ഉന്നയിക്കുന്നു. 45 ദിവസം കഴിഞ്ഞു. അതിനിടെ ഒരു സ്ഥാനാർത്ഥിയോ പാർട്ടിയോ ഒരു ക്രമക്കേടും കണ്ടെത്തിയിട്ടില്ല. ഇത്രയും ദിവസങ്ങൾക്ക് ശേഷം, അടിസ്ഥാനരഹിതമായ ആരോപണങ്ങൾ ഉന്നയിക്കുന്നതിന് പിന്നിലെ ഉദ്ദേശ്യം വോട്ടർമാരും രാജ്യത്തെ ജനങ്ങളും മനസ്സിലാക്കുന്നില്ല.
- 20 വർഷമായി എസ്ഐആർ നടപടിക്രമം നടത്തിയിട്ടില്ല… രാജ്യത്ത് 10 തവണയിൽ കൂടുതൽ എസ്ഐആർ നടത്തിയിട്ടുണ്ട്. വോട്ടർ പട്ടിക ശുദ്ധീകരിക്കുക എന്നതാണ് എസ്ഐആറിന്റെ പ്രധാന ലക്ഷ്യം. രാഷ്ട്രീയ പാർട്ടികളിൽ നിന്ന് നിരവധി പരാതികൾ ലഭിച്ച് ശേഷമാണ് എസ്ഐആർ നടത്തുന്നത്.
- ഈ രാജ്യത്ത് കോടിക്കണക്കിന് ആളുകൾക്ക് അവരുടെ വിലാസത്തിന് മുന്നിൽ ‘സീറോ നമ്പർ’ ഉണ്ടെന്ന് നിങ്ങൾക്കറിയാമോ? എന്തുകൊണ്ട്? കാരണം അവർ താമസിക്കുന്ന വീടിന് പഞ്ചായത്തോ മുനിസിപ്പാലിറ്റിയോ നമ്പർ നൽകിയിട്ടില്ല. എന്തുകൊണ്ടാണ്, അതും അറിയണം, കമ്മീഷൻ പറഞ്ഞു.
