കഴിഞ്ഞ തവണ കലാശപ്പോരില് കൈവിട്ട കിരീടം തേടിയാണ് ഇത്തവണ കാലിക്കറ്റ് ഗ്ലോബ് സ്റ്റാര്സിന്റെ ഒരുക്കം. കഴിഞ്ഞ സീസണില് ക്യാപ്റ്റനായിരുന്ന രോഹന് കുന്നുമ്മല് തന്നെയാണ് ഇത്തവണയും ടീമിനെ നയിക്കുന്നത്. സല്മാന് നിസാര് വൈസ് ക്യാപ്റ്റനായും തുടരും. കഴിഞ്ഞ സീസണിലെ ഫൈനല് പ്രവേശനത്തില് നിര്ണ്ണായക പങ്കു വഹിച്ച താരങ്ങളില് മിക്കവരെയും ഇത്തവണയും നിലനിര്ത്തിയിട്ടുണ്ട്. ഒപ്പം സച്ചിന് സുരേഷ്, മനു കൃഷ്ണ തുടങ്ങിയവരെ പുതുതായി ടീമില് എത്തിക്കാനുമായി.
455 റണ്സുമായി സല്മാന് നിസാര് ആയിരുന്നു കഴിഞ്ഞ സീസണിലെ ടീമിന്റെ ടോപ് സ്കോറര്. ക്യാപ്റ്റന് രോഹന് കുന്നുമ്മലും, എം അജിനാസും, അഖില് സ്കറിയയുമായിരുന്നു റണ്വേട്ടയില് രണ്ടും മൂന്നും നാലും സ്ഥാനങ്ങളില്. ഇവര്ക്കിടയിലേക്ക് സച്ചിന് സുരേഷും എസ്.എന്. അമീര് ഷായുമാണ് പുതുതായി ടീമിലെത്തിയ പ്രധാന ബാറ്റര്മാര്.
കൂറ്റന് ഷോട്ടുകളിലൂടെ ശ്രദ്ധേയനായ സച്ചിന് വിക്കറ്റ് കീപ്പര് കൂടിയാണ്. അടുത്തിടെ തിരുവനന്തപുരം എ ഡിവിഷന് ക്രിക്കറ്റ് ലീഗ് മല്സരത്തിനിടെ ഒരു കേരള താരം നേടുന്ന ഏറ്റവും ഉയര്ന്ന വ്യക്തിഗത സ്കോറുമായി സച്ചിന് ചരിത്ര നേട്ടം സ്വന്തമാക്കിയിരുന്നു. 197 പന്തുകളില് നിന്ന് 27 ബൗണ്ടറികളും 24 സിക്സും അടക്കം 334 റണ്സായിരുന്നു സച്ചിന് നേടിയത്. സച്ചിന് പുറമെ എം അജിനാസും വിക്കറ്റ് കീപ്പര് ബാറ്ററായി ടീമിനൊപ്പമുണ്ട്. മൂന്ന് അര്ദ്ധ സെഞ്ച്വറികള് അടക്കം 217 റണ്സായിരുന്നു അജ്നാസ് കഴിഞ്ഞ സീസണില് നേടിയത്.
ഓള് റൗണ്ടര്മാരുടെ നീണ്ടൊരു നിര തന്നെയുണ്ട് ഇത്തവണ കാലിക്കറ്റ് ടീമിനൊപ്പം. കേരള ക്രിക്കറ്റിലെ ഏറ്റവും മികച്ച ഓള് റൗണ്ടര്മാരില് ഒരാളായ അഖില് സ്കറിയ ആണ് കൂട്ടത്തില് ശ്രദ്ധേയന്. കഴിഞ്ഞ സീസണില് 25 വിക്കറ്റുകളും 187 റണ്സുമായി ടീമിന്റെ മികച്ച പ്രകടനത്തില് മുഖ്യ പങ്കുവഹിച്ച താരമാണ് അഖില്. പി.എം. അന്ഫല്, യുവതാരങ്ങളില് ശ്രദ്ധേയനായ പ്രീതിഷ് പവന്, കൃഷ്ണദേവന്, ഷൈന് ജോണ് ജേക്കബ്, മനു കൃഷ്ണന് എന്നിവരാണ് മറ്റ് ഓള് റൗണ്ടര്മാര്. ടൂര്ണ്ണമെന്റിലെ ഏറ്റവും മുതിര്ന്ന താരങ്ങളിലൊരാളായ മനു കൃഷ്ണന്റെ പരിചയസമ്പത്ത് ടീമിന് വലിയ മുതല്ക്കൂട്ടാവും. ഇടംകയ്യന് ഫാസ്റ്റ് ബൗളറും ബാറ്ററുമായ മനു കേരളത്തിനായി രഞ്ജിയിലും സയ്യിദ് മുഷ്താഖ് അലി ടൂര്ണ്ണമെന്റിലും ഉജ്ജ്വല ബൗളിങ് കാഴ്ച വച്ചിട്ടുള്ള താരം കൂടിയാണ്.
അഖില് സ്കറിയ, അഖില് ദേവ്, മോനു കൃഷ്ണ, ഇബ്നുല് അഫ്താബ്, കൃഷ്ണകുമാര് എന്നിവരാണ് പേസ് ബൗളിങ് നിരയിലുള്ളത്. എസ് മിഥുന്, അജിത് രാജ്, എം. യു ഹരികൃഷ്ണന് എന്നിവരാണ് സ്പിന്നര്മാര്.
കഴിഞ്ഞ സീസണില് ടീമിനെ പരിശീലിപ്പിച്ച കേരള മുന് രഞ്ജി ക്യാപ്റ്റന് കൂടിയായ ഫിറോസ് വി. റഷീദാണ് ഇത്തവണയും കാലിക്കറ്റിന്റെ ഹെഡ് കോച്ച്. അസിസ്റ്റന്റ് കോച്ചായി ഡേവിഡ് ചെറിയാനും, ബാറ്റിങ് കോച്ചായി മനോജ് കെ എക്സും ഫീല്ഡിങ് കോച്ചായി സുമേഷ് എം എസും ടീമിനൊപ്പമുണ്ട്. രാകേഷ് ബി മേനോനാണ് വീഡിയോ അനലിസ്റ്റ്. ഫിസിയോ ആയി ഡോ. ഷോണ് ആന്റണിയും സ്ട്രെങ്ത് ആന്റ് കണ്ടീഷനിംഗ് കോച്ചായി ഹരി ആര് വാര്യരും മെന്ററായി യു അച്യുതനും മാനേജറായി വിഷ്ണുദാസ് വി വിയും ടീമിനൊപ്പമുണ്ട്.
ടീം: രോഹന് കുന്നുമ്മല്(ക്യാപ്റ്റന്), സല്മാന് നിസാര്, അമീര്ഷാ.എസ്.എന്, എം.അജ്നാസ്, സച്ചിന്.എസ്, അഖില് സ്കറിയ, അന്ഫല്.പി.എം, മനു കൃഷ്ണന്, കൃഷ്ണദേവന്, ഷൈന് ജോണ് ജേക്കബ്, പ്രീതിഷ് പവന്, മോനു കൃഷ്ണ, അഖില്ദേവ്.സി.വി, ഇബ്നുല് അഫ്താബ്, എസ്.മിഥുന്, അജിത് രാജ്.ജി, കൃഷ്ണകുമാര്.ടി.വി, ഹരികൃഷ്ണന് എം.യു.
