വാഷിംഗ്ടണ്: റഷ്യയില് നിന്നും എണ്ണ വാങ്ങുന്ന ഇന്ത്യയ്ക്കെതിരെ ഇപ്പോള് ചുമത്തിയിരിക്കുന്ന 50 ശതമാനത്തേക്കാള് കൂടുതല് വ്യാപാരത്തീരുവ ചുമത്തേണ്ടിവരുമെന്ന ഭീഷണിയുമായി അമേരിക്കന് ട്രഷറി സെക്രട്ടറി സ്കോട്ട് ബെസെന്റ്. അതേ സമയം ഇന്ത്യയെ അമേരിക്കയുടെ വ്യാപാരത്തീരുവ ബാധിക്കാന് പോകുന്നില്ലെന്ന നിരീക്ഷണവുമായി രംഗത്ത് വന്നിരിക്കുകയാണ് ആഗോള റേറ്റിംഗ് ഏജന്സിയായ സ്റ്റാന്ഡേര്ഡ് ആന്റ് പുവേഴ്സ് (Standard & Poor’s or S & P എസ് ആന്റ് പി). ഇന്ത്യ ലോകത്തിലെ ഏറ്റവും വേഗത്തില് വളരുന്ന സമ്പദ് വ്യവസ്ഥയായി തുടരുമെന്നും ഇന്ത്യയുടെ സാമ്പത്തിക വളര്ച്ച 6.5 ശതമാനമായി നിലനില്ക്കുമെന്നും സ്റ്റാന്ഡേര്ഡ് ആന്റ് പുവേഴ്സ് പറയുന്നു.
“ഇനിയും ഇന്ത്യ നേരെ ചൊവ്വേ പോയില്ലെങ്കില് വ്യാപാരത്തീരുവ ഇനിയും ഉയര്ത്തേണ്ടതായി വരും. ഉപരോധവും സെക്കന്ററി താരിഫുകളും ഏര്പ്പെടുത്തേണ്ടിവരും. “- സ്കോട്ട് ബെസെന്റ് ഭീഷണി സ്വരത്തില് പറയുന്നു. ഇന്ത്യയുടെ യുഎസുമായുള്ള കയറ്റുമതി ഇപ്പോഴേ പ്രതിസന്ധിയില് നില്ക്കുന്നതിനിടയിലാണ് പുതിയ ഭീഷണി.
ചൈന ലോകത്തിന്റെ ബോസ്സാണെന്ന് കരുതുന്നു
“യൂറോപ്യന് യൂണിയനും ഈ വ്യാപാരത്തീരുവയുടെ കാര്യത്തില് യുഎസുമായി ചേരണം. ഇത് ഇവരുടെ നാവടക്കാനുള്ള സമയമാണ്. ചൈനയ്ക്കെതിരെയും ഉയര്ന്ന വ്യാപാരത്തീരുവ ഏര്പ്പെടുത്തേണ്ട സമയമായി. ചൈന ലോകത്തിന്റെ ബോസ്സാണെന്നാണ് വിചാരിക്കുന്നത്. ചൈനയ്ക്കെതിരെ ഉയര്ന്ന വ്യാപാരത്തീരുവ ചുമത്താന് യൂറോപ്യന് രാജ്യങ്ങളും തയ്യാറാവണം.”- സ്കോട്ട് ബെസെന്റ് പറയുന്നു.
യുഎസ് വ്യാപാരച്ചുങ്കം ഇന്ത്യയെ ബാധിക്കില്ലെന്ന് സ്റ്റാന്ഡേര്ഡ് ആന്റ് പുവേഴ്സ്
ഇന്ത്യ യുഎസിന് പകരം മറ്റ് രാജ്യങ്ങളിലേക്ക് കയറ്റുമതി നടത്താനുള്ള വഴികള് ആലോചിച്ചുവരികയാണ്. അതിനുള്ള കരുനീക്കങ്ങള് ആരംഭിച്ചു കഴിഞ്ഞു. മാത്രമല്ല, യുഎസ് ഏര്പ്പെടുത്തിയ വ്യാപാരത്തീരുവ ഇന്ത്യയുടെ സമ്പദ് വ്യവസ്ഥയെ ബാധിക്കില്ലെന്ന് ആഗോള റേറ്റിംഗ് ഏജന്സിയായ സ്റ്റാന്ഡേര്ഡ് ആന്റ് പുവേഴ്സ് വിലയിരുത്തുന്നു. എസ് ആന്റ് പി ഗ്ലോബല് റേറ്റിംഗ്സ് ഡയറക്ടര് യീഫാന് ഫുവയാണ് ഈ പ്രസ്താവനയുമായി രംഗത്ത് വന്നിരിക്കുന്നത്. കാരണം യുഎസിലേക്കുള്ള കയറ്റുമതിയില് നിന്നും ഇന്ത്യയ്ക്ക് ലഭിക്കുന്നത് ഇന്ത്യയുടെ ആകെ ജിഡിപിയുടെ വെറും രണ്ട് ശതമാനം മാത്രമാണെന്നും ഇത് അവഗണിക്കാവുന്നതാണെന്നും സ്റ്റാന്ഡേര്ഡ് ആന്റ് പുവേഴ്സ് പറയുന്നു.
